Tripura : IPFT-te'n State hran phutin nawr huaihawt

Tripura-a tribal party Indigenous People’s Front of Tripura (IPFT)-te chuan Thawhṭanni khan state hran pek phutin nawrh an huaihawt a, National Highway (NH) leh railway line an dangchat.

IPFT-te hian an state chakkhai lama kawngpui pawimawh NH-8 leh railway line-te chu an dangchat a, an thil phut tihhlawh tlin ngei an phut thu an sawi. Hetih lai hian Tripura sorkar chuan IPFT-te thil tih hi a dem thu a sawi a, mipuite harsatna thlen zawnga cheah a puh. Nawrh huaihawtna hmunah hian Central Reserve Police Force (CRPF), Tripura State Rifles (TSR) bakah state police ṭhahnem tak duty tir an ni a, buaina thleng lian tham a awm hriat a ni lo. Inspector General of Police (law and order) K.V. Sreejesh chuan buaina chhuak a awm lo a, nawrh huaihawt hi mipui pawhin an thlawp ṭha hle a ni, a ti.

Rel kawng dan a nih avang hian North­east Frontier Railways chuan rel service-te chu a titawp lailawk a ni. Hei hian Agartala leh Silchar pana tlan service chu a tikhaihlak a ni. NH-8 ah pawh lirthei eng emaw zat an tangkhang a ni. IPFT-te hian a hma pawhin Tripura Tribal Areas Autonomous District Council (TTAADC) area zauh phutin nawrh an lo huaihawt tawh bawk.