Manipur CM-in tuilenna hmun tlawh

Manipur Chief Minister N. Biren Singh chuan an state chhunga tuilennna hmun Imphal East, Imphal West leh Bishnupur district-te chu a tlawh a, district thuneitute chu chhawmdawl hna chak zawka thawk turin a ngen.

Chief Minister chuan harsatna tawk mek te chhawmdawl hna chhun zan zawma thawh a nih tur thu a sawi a, hmanrua leh bungraw mamawh angte pawh tikhaw tlai loa pek nghal an nih tur thu a sawi. CM hian tuilen nasatna hmun - Khurai Salan­thong, Haotal, Khabeisoi, Kongpal Kshetri Leikai, Kongpal Khaidem Leikai, Kongpal Kshetri Leikai, Porompat Thawanthaba, Ayangpalli Road, Kongba Mutum Leikai leh Kongba Laishram Leikai-te a tlawh a, Kongpal Kongkham Leikai, Amateur Athletic Association community hall, Ningthem Pukhri Mapal leh Kongba Laishram Leikai-a relief camp-te a tlawh bawk.

Manipur-ah hian June thla aṭang khan hmun tam takah tuilian avangin mipuiin harsatna an tawk a, ruah a sur ve reng bawk avangin tuilian hian ziaawm lam a pan thei meuh lo. Imphal West leh Bishnupur districta-a khaw ṭhenkhat chu tui hian a chimpil tawh nia tarlan a ni. CM Biren Singh hi Parliamentary Secretary L. Susindro, N. Indrajit, Dr. S. Ranjan leh sorkar mi pawimawhten an ṭawiawm a ni.

Hetih lai hian Manipur leh Assam ang bawkin Arunachal Pradesh hmun hang hrangah tuilian vanga harsatna tawk chhungkaw eng emaw zat an awm. Arunachal Chief Minister Pema Khandu chuan tuilian leh leimin avanga chhiat tawkte chu a tawrhpui thu sawiin, state sorkar chuan an mahni chhawmdawlna tur a ngaihtuah sak dawn tih a sawi. Chhiatna thleng avanga nunna chan an awm chu pawi a tih thu sawiin, zángnadawmna ngaihtuah sak a tiam bawk. Pema Khandu chuan Minister leh MLA-te chu an bial chhunga harsatna tawkte thlamuan tur leh an mamawhte pek an nih theih nana hma la turin a ngen a, tuilian tuarte chuan ei leh in tur an hnianghnar tur a ni, a ti.

Tuilian hian hmun tam takah inkalpawhna kawngpui a chim a, hei hian harsatna a belhchhah hle. Assam panna kawngpui National Highway - 415 pawh kaltlang thei lohin a awm nia tarlan a ni. Hmun tam takah leiminin kawngpui a tichhia a, hei hian lirthei chevel a tibuai hle bawk. PWD, police, NDRF leh SDRF-te chuan kawngpui thenfai hna hi an thawk a ni.