Manipur-ah sipai ruang chhar

Manipur-a Bishnupur district-ah Thawhṭannni khan sipai pakhat chu thia hmuh a ni a, a luah silaia kahna hnuhma hmuh a ni.

Amah hi 4 Assam Regiment a mi Ha­vildar Moirangthem Herachandra a ni. A ruang hi Kwak Siphai leh Nachou inkarah Thawhṭanni zing khan hmuh a ni a, Pathianni zana thil thleng nia ngaih a ni. Manipur police-te chuan Herachandra hi hel kuta thi a nih an rin thu a sawi a, he thil thleng hi chhui zui nghal a ni, a ti. A ruang hi forensic expert-te chuan an endik tawh a ni. Herachandra hi Chandel district-a Molcham camp a awm a ni a, tun hnai khan chawlh hmangin a haw tih an sawi. He pawikhawihna hi eng hel pawl mahin an tih a nih thu an la chhal lo.

Hetih lai hian Mani­pur police-te hian kar kalta Ningani khan Imphal valley-ah hel mi leh sa panga an man a, an zingah hian hmeichhe pakhat a tel. An mi man te hi United National Liberation Front (UNLF) mi leh sa an ni a, Thoubal district-ah man an ni. Police-te hian tunhnai khan Kangleipak Communist Party (Lam­yanba Khuman) mi leh sa an lo man tawh bawk a, an kut aṭang hian .32 mm pistol leh a mu ṭhahnem tak an man a ni.