Nagaland-a lei chimah mi pali an thi

Nagaland-a Dimapur-ah Thawhlehni khan lei a chim a, mi pali an thih bakah midang pangin hliam an tuar.

Lei chimna hmun hi Dima­pur-a Christian Institute of Health Sciences & Research (Referral) hospital bulah a ni a, tlai lam dar 5 velah lei hi a chim a ni. Lei hi Chathe River chungah dawh a ni a, 4th Mile aṭanga Dimapur leh Niuland panna pawimawh tak a ni. Dimapur Commissioner of Police Limasunep Jamir chuan a hmunah mi pali an thi nghal tih sawiin, mi panga in hliam an tuar tih a sawi. Thi zinga mi pathum - Jaheda Ali (28), Sahil Ali (11) leh Bakshad Ali (32)-te chu chhungkaw khata cheng an ni a, thi zingah hian hmeichhe pakhat a tel bawk. Lei chim chhan hi tarlan a ni lo a, thil thlen dan kimchang chhui zui nghal a ni. Lei chim avang hian Dimapur aṭanga Niuland leh Kuhuboto panna kawngpui chu khar lailawk a ni. He lei hi Naga hel - National Socialist Council of Nagaland-Unification (NSCN-U)-te camp awmna khua Kheloi panna nia tarlan a ni bawk.

Hetih lai hian Arunachal Pradesh-a Papum Pare district-ah pawh Thawhlehni khan nasa takin lei a min a, leimin hian mi panga a chhilh hlum a, chenna-in pariat a chhia. Leiminna hmun hi Papum Pare district-a Laptap khua a ni a, chenna-in pariat a hnawl a ni. Leimin hian mi 14 vel a chhilh nia tarlan a ni a, an zinga panga chu lakchhuah tawh an ni a, thi zat pawh hi an pun belh theih thu tarlan a ni. Leimin chhan hi ruah sur nasat vang nia tarlan a ni a, hmun hrang hrangah leimin report a awm. Chief Minister Pema Khandu chuan nunna chan chhungte chu a tawrhpui thu a sawi a, thi chhungte hnenah hian state sorkar chuan cheng nuai li ṭheuh a pe dawn tih a sawi. Leiminin a tichhiat chenna-in neitute pawh zángnadawm-na pek an nih tur thu a sawi bawk.

Khandu chuan vanduaina tawkte chhanchhuah hna hi thawh nghal a nih thu sawiin, an chenna tur leh an ei leh in tur pawh ngaihtuah sak an nih thu a sawi. Vanduaina thlenna hmnunah hian medical team pawh tirh nghal an ni a, chhanchhuah hna thawktu ṭhahnem tak tirh an ni bawk. Chief Minister chuan tunhnaiah ruah sur nasa vangin hmun hrang hrangah chhiatna thleng report a awm tih sawiin, mihring tana him lo nia ngaiha cheng chhungkaw eng emaw zat chu hmun him lamah sawn an nih thu a sawi. District thuneitute chu anmahni huamchhung ṭheuhah mipui himna tur ngaihtuaha hma la turin hriattir an nih thu a sawi a, hetih rual hian mipuite chu chiai lo turin a chah.