Nagaland CM Liezietsu-a'n floor test hmachhawn dawn

Nagaland Governor P.B. Acharya chuan Chief Minister Shurhozelie Liezietsu chu assembly-ah thlawptu a ngah tawk em tih fiah turin a a ti a, floor test a hmachhawn ang.

Governor P.B. Acharya chuan CM Liezietsu chu assembly-ah July 15 ral hmaa floor test buatsaih turin a hriattir a, mahse hei hi July 17-a India president thlanna neih tur nena a inhnaih chilh avangin sawn leh a ni. Hemi chungchangah hian Raj Bhavan chuan thuchhuah a la siam leh lo a, floor test neih hun tur hi tihchian a la ni lo.

Hetih rual hian Governor hian chief minister hlui TR Zeliang chu assembly-ah no-confidence motion pulut a, legislator zingah thlawptu a ngah tawk tih assembly speaker Imtiwapang Aier hnenah lantir turin a ti. Hriattirna hi Thawhlehni khan tihchhuah a ni a, CM Liezietsu hian floor test a paltlang lo a nih chuan chief minister aṭanga paithlak a ni ang.

Nagaland-ah hian rorel lai Naga People’s Front (NPF) member eng emaw zat chu CM lakah hian an hel a, a nihna aṭanga paihthlak tumin hma an la mek a ni. Tribal-te nawrna avanga Chief Minister aṭanga bang ta T.R Zeliang chuan chief minister ni leh turin thlawptu a ngah tawk tih Governor a hriattir tawh a, NPF legislator 30-te'n an thlawp niin a sawi. Hei bakah hian Independent MLA pasarihten an thlawp bawk niin a sawi a, sorkar din turin thlawptu a ngah tawk tih a sawi bawk.

CM ni lai Liezietsu chuan July 29 hian Northern Angami-I assembly constituency-ah by-election a hmachhawn dawn a, mahse amah thlawp lo tuten paihthlak tuma hma an lak avangin kaltlangpui a ni dawn em hriat a ni rih lo. Liezietsu hi NPF president a ni a, TR Zeliang-a'n banna a thehluh hnuah chief minister atan lakluh a ni a, mahse election hnuhnung berah khan a chuh ve loh avangin legislator ni turin by-election-ah thlan tlin a ngai a ni. Liezietsu hi February 22 khan chief minister atan lak luh a ni chauh a, mahse a thawhpuite chuan uchuak taka a fapa duhsak leh, an hriatpui loha cabinte minister status peah puhin bang turin an nawr ta a ni.

Liezietsu hian amah paihthlak tumtu minister pali bakah Parliamentary Secretary 10-te chu a ban a, party aṭangin mi eng emaw zat a hnawtchhuak bawk. CM hian a fapa Khriehu Liezietsu chu a advisor atan ruatin, cabinet status a pe a, cabinet minister-te hlawh ang a hlawh bawk. Khriehu hi MLA a ni a, Northern Angami-I assembly constituency aṭanga thla tlin a ni. Hetih lai hian a pa tan seat kianin MLA aṭangin a bang a, a kalsan tak Northern Angami-I assembly-ah hian July 29 hian by-election neih tura tih a ni. Liezietsu hian Thawhlehni khan nomination a thehlut a, party chhunga buaina awm mek chu chinfel thuai a nih tur thu a sawi.

Hetih lai hian CM nih tuma bei leh mek Zeliang hian New Delhi a pan hnuah Prime Minister Narendra Modi leh Home Minister Rajnath Sing-te meeting a neihpui a, Governor Acharya pawh a hmu bawk. CM laka hel NPF leh Independent MLA eng emaw zat chu Assam-a Kaziranga-ah an camp a, sorkar thar din turin an inbuatsaih a ni. Zeliang hian sorkar thar din turin NPF leh Independnet MLA-te thlawpna a hmu ṭha a, thlawptu a ngah tawk nia tarlan a ni bawk. Nagaland assembly-ah hian member 60 awmin, NPF chuan member 47 an nei a, Bharatiya Janata Party (4) leh Independent pariat an awm mek a ni.