Assam : Tuilianin zual lam a pan Mi 40 chuang an thi tawh

Assam-a tuilian chuan zual lam a pan zel a, mi 40 chuang an thi tawh a, mi nuai 17 velin harsatna nasa tak an tawk mek.

Tuilian avanga chhiatna thlengah tun hnai khan mi eng emaw zat an thi leh a, thi zat hi mi 44 an tling tawh nia tarlan a ni. District 24-a mi nuai 17 vel zet chuan harsatna namen loh an tawk mek a, chhungkaw tam takin an himna turin an chenna-in leh lo an chhuahsan a ni. Assam State Disaster Management Authority (ASDMA) chuan tun hnaia ruah nasa taka a sur leh avangin tuilian tuar hi an pun belh tih an sawi a, state chhunga lui eng emaw zat chu hlauhawm chhinchhiahna chungah an luang mek a ni. Heng luite hian hmun tam takah mihring chenna leh thlai chinna hmun an chim tawh a, cheng tam tak man hu thlai leh bungrua a chhe tawh a ni.

Dibrugarh, Jorhat, Sivasagar, Barpeta leh Kamrup Metropolitan district-ahte Thawhlehni khan mi paruk an thi leh a, lui lianin a lak ruang la hmuh lo a awm nia report a ni bawk. ASDMA chuan harsatna tawk mek hi mi 17,18,135 an tling tawh niin an sawi a, Lakhimpur, Bongaigaon, Darrang, Jorhat, Golaghat, Cachar, Dhemaji, Biswanath, Karimganj, Sonitpur, Majuli, Barpeta, Nagaon, Nalbari, Sivasagar, Morigaon, Chirang, Dibrugarh, Dhubri, Kokrajhar, South Salmara, Charaideo leh Goal­para district-a chengte chuan tuilian hi an tuar nasa zual tih an sawi.

Assam Governor Banwarilal Purohit chuan Nagaon district-a tuilian tuarte chu a hmunah kalin an harsatna tawh mek a enfiah a, chenna-in nei lo relief camp-a awm te a tlawh kual bawk. Chief Minister Sarbananda Sonowal pawhin hmun hrang hranga tuilian tuarte chu a lo tlawh tawh bawk a, minister leh MLA-te pawhin an bial chhunga harsatna tawkte an tlawh ve bawk. Tun dinhmunah tuilian hian district hrang hranga khaw 2,498 vel zet a chimpil tawh a, thlai chinna hmun ram hectare nuai 1.4 zet a chim tawh bawk.

Chief Minister Sarbananda Sonowal chuan Nilaini khan a bial chhung Majuli district a tlawh a, relief camp hrang hrang a tlawh kual. Majuli hi Brahmaputra thliarkara awm a ni a, tun dinhmunah mi 48,000 velin tuiliana vangin harstana an tawk mek a, thlai chinna hmun ram hectare 1,760 vel zet chu tuiin a chim tawh bawk. Sonowal hian Kaziranga National Park pawh a tlawh bawk a, official-te meeting neihpuiin ramsa leh nungchate himna tura chak zawka hma lak dan tur an sawiho a ni. CM chuan Nagaon, Golaghat, Karbi Anglong, Sonitpur leh Biswanath district thuneitute chu tuilian remchanga hmanga sapel tumte chu Forest Minister hnenah hriattir vat ṭhin turin a ngen bawk.

Ṭum dang ang bawkin Brahmaputra lui kama awm Kaziranga National Park pawh tuilian hian a chim leh tawh a, ram zau tak chu tuilian hian a chimpil tawh a ni. Park area 73% zet chu tuiin a chim tawh a, hmun 129-ah anti-poaching cap area siam a ni. Centre for Wildlife Rehabilitation and Conservation (CWRC) chuan tuilian avang hian ramsa eng emaw zat an thi tawh tih an sawi a, Thawhlehni khan sazuk pakua te chu chhanchhuah an nih thu an sawi. Ramsa dang eng emaw zat pawh an dinhmun a ṭha vak lo tih an sawi a, hmun him lamah sawn mek zel an nih thu an sawi.

Ramsa himna zawngte hian hmun sang lam an panna, an kalna kawngah hian National Highway 37 paltlang a ngaih avangin ramsa eng emaw zat chu lirthei che velin an su hlum tawh tih an sawi bawk.