National Media-te'n hmar-chhak an ngaihthah : Rijiju
Union minister of state for home affairs Kiren Rijiju chuan hmarchhak state hrang hrangin tuilian leh chhiatna thleng dang avangin harsatna nasa tak an tawk mek a, hetih lai hian national media-te chuan hmarchhaka chhiatna thleng mek hi an ngaihthah niin a sawi.
Rijiju chuan a Twitter-ah he thu hi tarlangin, "National media-te chuan Jammu and Kashmir leh Chennai-a tuilian avanga chhiatna thleng te chu an tarlang chamchi a, hetih lai hian hmarchhak chhiatna theng erawh tarlan a ni ve lo" a ti. National media-te chu hmarchhak mite harsatna tawh mek tarlang ve duh loah puhin, pawi a tih thu a sawi. Union minister thusawi hi Manipur Chief Minister N Biren Singh pawhin a thlawp thu sawiin, "Rijiju thusawi hi a dik a ni, national media-te chetdan hi a 'bias' takzet a ni" a ti.
Tun dinhmunah hmarchhak state Assam, Manipur leh Arunachal-te'n tuilian avangin harsatna an tawk mek a, Assam-ah chuan mi 40 chuang an thi tawh a, Manipur-ah pawh cheng vaibelchhe tam tak man hu a chhe tawh a ni. Arunachal-ah pawh ruahsur nasa vanga leiminah mi 14 an thi a, Sikkim leh state dang pawhin harsatna hrang hrang an tawk mek a ni.