Tripura-ah IPFT-te'n nawrh an chhunzawm

Tripura-a tribal party-te'n state hran phuta nawrh ann huaihawt chu Thawhlehni khan chhunzawm a ni a, ni li chuang National High­way leh railway line-te dan chah a ni tawh.

Nawrh hi Indigenous People’s Front of Tripura (IPFT)-te bul tuma neih a ni a, Thawhlehni ṭang khan state chhung hmun hrang hrangah kalpui

ṭan a ni. Chakkhai lamna kawngpui pawimawh NH leh rel kawng te dan a nih avangin nunphung a khaihlak nasa hle a, lirthei eng emaw emaw zat kawng lakah an tangkhang a ni. Rel service pawh tihtawp lailawk a ni a, hei hian zin veivakte tan harsatna a thlen nasa hle. Northeast Frontier Railway (NFR) Chief Public Relations Officer Pranav Jyoti Sharma chuan, rel kawng dan a nih avangin service ṭhenkhat tihtawp lailawk a ni a, hun rei loteah dan pangngaia tlan tir leh thuai an beisei tih a sawi. Rorel lai Left Front chuan IPFT-te chu an thil tih tawpsan turin an ngen a, mipuite harsatna thlen zawnga nawrh huaihawt lo turin an hriattir.

IPFT President Naren­dra Chandra Debbarma chuan an thil phut chungchangah hmalakna a awm a nih loh chuan nawrh hauihawt chhunzawm zel an tum thu a sawi a, an thil phut chu a tawp thlenga an nawr tur thu a sawi. Tri­pura Tribal Areas Auto­no­mous District Council (TTAADC) area tihhma­sawnna chu an duh ber a nih thu sawiin, state hran din a, mahnia ro inrel chu an hmasawnna tur kawng pawimawh ber a nih thu a sawi. IPFT aiawhte chuan New Delhi an pan dawn a, an thil phut chung­chang sawipui turin Jitendra Singh leh Home Ministry aiawhte an dawr dawn nia tarlan a ni.

TTAADC hian Tripura state huam chhung hmun thuma ṭhen hmun hnih a huam a, a area zau zawng hi sq.km 10,491 zet a ni. Heng hmuna cheng tam zawk hi tribal an nui a, mi nuai 12 vel an khawsa mek a ni.