Hmarchhaka chhiatna thleng zirchiang dawn

Indian Space Research Orga­nisation (ISRO) chuan tun hnaia hmarchhaka chhiatna thleng hrang hrangte an zirchiang dawn.

Minister for Development of North East Region (DoNER) Jitendra Singh chuan tun hnaia chhiatna hrang hrang thlengah mi 100 dawn an thi tawh tih sawiin, hei hi ISRO-a mithiamte chuan a zirchiang dawn tih a sawi. Zirchianna nei tur hian sorkar laipuiah rawtna thlen a nih tawh thu sawiin, tuilian avanga hrileng a awm lohna turin Health Ministry chu hma la tura beisei a nih thu leh, inbiakpawhna chhia chungchang pawh Telecom Ministry-ah thlen a nih thu a sawi. Jitendra Singh chuan, "Zirchianna nei tur hian DoNER Ministry chuan hma a la dawn a, Prime Minister Office pawh hriattir tawh a ni" a ti.

Hmarchhakin tuilian, leimin leh chhiatna hrang hrang a tawh chungchang ngaihtuah hian Ningani khan Assam-ah meeting neih a ni a, minister of state for home affairs, Kiren Rijiju chuan meeting hi a kaihruai a ni. He hunah hian chhiatna thlengin harsatna a thlente sawiho a ni a, zirchianna neih a nih theih nana hmalak dan tur te sawiho a ni bawk. Tun hnaia ruah sur nasa tak avang khan hmarchhak sate hrang hranga district 58 vel zet chuan harsatna an tawk a, mi 80 velin nunna an chan tawh a ni.

Assam Chief Minister Sarba­nanda Sonowal chuan tuilian avanga chhiat tawkte chu sorkar laipuiin ṭanpuina a pe dawn tih a sawi. Relief camp hrang hranga awmte leh chenna nei loten ei leh in tura harsatna an tawh loh nan hmalak zel a nih tur thu a sawi bawk. Arunachal Pradesh Chief Minister Pema Khandu pawhin chhawmdawl hna thawk tura sorkar laipui a inpeih thu a sawi. Meeting neih hma Nilaini khan Prime Minister Narendra Modi chuan Assam CM Sonowal hnenah tuilian avanga harsatna tawkte a tawrhpui thu a lo hrilh tawh a, ṭanpuina awm thei angte ngaihtuah sak an nih tur thu sawiin, hmarchhak state danga chhiat tawkte pawh chhawmdawlna pek an nih tur thu a hrilh a ni.

Prime Minister chuan a twitter-ah hmarchhakin chhiatna hrang hrang a tawk mek a tawrhpui thu hi a tarlang bawk a, ram mipuite chu hmarchhaka harsatna tawkte tan an ding a, chak taka hma lak a nih tur thu a sawi. PM chuan Arunachal-a leimin rapthlak tak thlenga nunna chan chhungte hnenah zángnadawmna cheng nuai hnih pek an nih tur thu a sawi a, hliam tuarte pawh cheng 50,000 ṭheuh pek a tiam a ni. Arunachal-a leiminah hian mi 14 an thi a, an vai hian chhungkaw khata cheng an ni. Leimin hian in pariat a hnawl a, midang eng emaw zat an hliam bawk.

Union minister Rijiju pawhin Laptap khuaa leimin avanga chhiat tawk te hi a tlawh a, ṭanpuina a hlan a ni. CM Pema Khandu pawhin leiminna hmun hi a tlawh a, thi chhungte a tawrhpui thu leh hliam tuarte chu dam leh thuai tura a duhsak thu a sawi. Union Power Minister Piyush Goyal pawhin hmarchhakin chhiatna hrang hrang an tawk chu a tawrhpui takzet tih sawiin, a ṭul tula hman turin cheng vaibelchhe 10 ruahman a nih thu a sawi bawk. Gas semchhuahna pipeline chhiate pawh siam ṭhat leh vat a nih tur thu sawiin, mipuite harsatna tawh chu a ranglama chinfel a nih tur thu a sawi.

June thla tir aṭang khan hmar­chhak hmun hrang hrangah ruahsur nasa avanga chhiatna thleng a tam hle a, Assam-ah chuan tun thlengin mi nuai tam takin tuilian avangin harsatna an la tawk a ni. Assam-ah hian tuilian leh a kaihhnawih chhiatna thleng vanga nunna chan mi 40 chuang an awm tawh a, chenna-in nei lo mi tam tak an awm bawk. Manipur leh Arunachal-te pawhin tuilian hi an tuar ve mek bawk a, mahse Assam ang em emin an tuar nasa lo thung. Hetih lai hian Arunachal-ah hian Thawhlehni khan lei nasa takin a min a, mi 14 an thi a, midang tam taklin hliam an tuar a ni. Mizoram-ah pawh leimin leh tuiliana vangin chhungkaw tam takin harsatna an tawk a, nunna chan bakah, hliam tuar mi eng emaw zat an awm a ni.