EC-in Pakke-Kameng by-election neih tur ṭhulh

Election Commission (EC) chuan Arunachal Pra­desh-a Pakke leh Kessang assembly constituency-a by-election neih tur chu ṭhulh a nih thu a tarlang.

By-election hi July 29-a neih tura tih a ni a, mahse tun hnaia ruah sur nasa taka avanga state chhunga chhiatna hrang hrang thleng vangin kaltlangpui a ni dawn lo. Chief Electoral Officer (CEO) chuan tun hnaiah chhiatna rapthlak tak tak a thleng a, mi tam takin nunna an chan a, inbiak pawhna leh inkalpawhna a mumal lo a, hei vang hian by-election hi kaltlangpui theih a ni lo, a ti. Constituency pahnihah hian polling station 26 zinga pakua chauhah inthlan kalpui theih a ni, a ti bawk.

Hetih lai hian EC-in by-election neih a ṭhulh hi Aruna­chal Pradesh Congress Committee (APCC) chuan an dem thu an sawi a, hemi duh lohna lantir hian darkar 24 awh bandh an huaihawt tur thu an sawi. APCC pre­sident Takam Sanjoy chuan, "EC thuchhuah siam hi a vanduaithlak takzet a, Chief Secretary in-charge chuan Chief Electoral Officer hnenah dik lo takin report a siam a ni" a ti. He thil thleng duh lohna lantir hian Itanagar khawpuiah nawrh huaihawt an tum thu a sawi bawk.