AASU-in Arunachal Pradesh pawhtu kawngpui an dang

Assam leh Arunachal Pradesh inrina, Assam-a Lakhimpur district-ah Arunachal Pradesh aṭanga kal misual ṭhenkhatin Village Defence Party an bei a, mi parukin hliam an tuar.

He thil thleng avanga lungawi loin All Assam Students’ Union (AASU) chuan Arunachal Pradesh pawhtu kawngpui an dang zui ve nghal a ni.

Thawhṭanni khan Arunachal Pradesh mi palite chuan Lakhimpur district-a Rupahi Rajgarh area-a motor nena an tlankual chu VDP-te hian thu an zawtfiah a, a hnuah an kaltir leh mai niin police-te chuan an sawi. Mahse hemi hnu hian heng mi palite hi Arunachal Pradesh aṭang hian mi 40 vel nen rawn kir lehin, VDP mi leh sate chu kut an rawn thlak a ni, a ti. VDP member parukin hliam an tuar tih a sawi bawk.

VDP member-te kut thlak an ni chu an lungawi loh thu sawiin, AASU local unit chuan misualte hi a rang thei anga man turin thuneitute an phut a, AP pawhtu kawngpui an dang bawk a ni. Mahse a hnuah Arunachal Pradesh sorkar official-te chuan pawikhawihna thlenna hmun hi tlawhin, AASU hnenah misualte hi man ngei an tiam a, hemi hnu hian kawngpui dan hi an titawp a ni.

Assam leh Arunachal Pradesh ramri hi km 804.1-a thui niin, ramri chungchangah hian hmun 1,200 velah state pahnihte hian buaina an nei niin nikum state assembly-ah khan Assam chief minister Himanta Biswa Sarma chuan a sawi.