Tripura Congress-in helpline number an siam

Tripura-a eptu pawl, Congress party chuan state-a rorellai party-te lak aṭanga politics thil avanga hrek leh rahbeh tawkte tan helpline number an siam.

Congress MLA Sudip Roy Barman chuan helpline an siam chhan ber chu rorellai party-ten an rahbeh avanga aw chhuah ngam lo mipuite tana aw chhuahsaktu tur a ni tih a sawi. "Kan state-a dan leh thupek dinhmun hi mitinin kan hre vek a ni. Mipuite tana beiseina siamsak a, inrinngamna a awm theihna turin hma kan la a ni. An harsatnate hi WhatsApp number aṭang pawhin min hrilh thei ang. Harsatna hrang hrang an rawn sawite hi Congress party chuan political movement hmangin hma a la lakpui zel dawn a, aw chhuah ngam lo mipuite tan aw a chhuahsak dawn a ni," a ti.

Tripura-a rorellai, BJP chuan an party sawiseltute chu kut an thlak loh leh, an vau a, hei vang hian mipui rilruah hlauhna an tuh tawh a ni tiin, Congress MLA chuan hlauh vangin tharum thawhna tuartute pawh chuan lungawi lohna an tilang ngam lo tih a sawi. Mahse Congress party chuan an vaunate hi an hlau ve lo a, mipuite tan an ding zel dawn tih a sawi.

Nakkumah assembly inthlan an neih dawn avangin Congress party hian state chhung hmun hrang hranga campaign neih chhoh thuai an tum tih an sawi bawk.