AP CM-in sipai hnena thlai supply tur vailiam

Arunachal Pradesh chief minister Pema Khandu chuan state chhunga self-help group (SHG) leh hmeichhe pawl dangte'n an thlai chin te chu Army hnenah supply turin Thawhlehni khan a vailiam.

Heng thlaite hi Arunachal Pradesh-a Army unit hrang hrangah thawn an ni ang. Lower Dibang Valley-a Bolung, West Kameng district-a Chug leh Namsai district-a Gunanagar aṭanga thawnchhuah turte hi CM hian virtual hmangin a vailiam a ni.

Arunachal Pradesh sorkar hian "Mission Krishi Veer" programme hnuaiah Army hnenah thlai supply hna hi a kalpui a ni. Hei hi state chhunga loneitute pawhin an chhawr ṭangkai dawn a, an sum lakluh a pun phah chauh ni loin sipaite pawhin thlai tharlam tak takte an dawn avangin an hriselna pawhin a ṭhat phah ngei dawn a ni, a ti.