Assam-ah Covid-19 kai mi 42 awm tawh

Assam-ah Ningani khan coronavirus kai panga hmuh belh leh an ni a, an state-a hri kai awm zat hi mi 42 an tling tawh a ni. 

Ningania hri kai mi panga hmuh thar zinga pali hi Bongaigoan district ami niin, pakhat hi Karimganj ami a ni. Hri kai zinga pakhatin a thihpui tawh a, mi 29-te chu enkawl dam an ni tawh a, damdawiin aṭangin chhuahtir an ni tawh a ni. Mi 12-te chu enkawl mek an ni bawk. 

Bongaigaon district-ah hri kai pali hmuh an nih avangin he district hi Red Zone-ah puan nghal a ni a, deputy commissioner chuan hri kai pathum awmna Bongaigaon khuaa hmun thum containment zone-ah a puang bawk. He district-ah hian Covid-19 kai hi mi panga an awm a, Nilaini khan  hmeichhe tleirawl pakhatin a kai tih hriat a lo ni tawh bawk a ni. 

Health minister Himanta Biswa Sarma chuan Ningania Bongaigaon district-a hri kai pali hriat tharte hian he hri lo kai tawhte nen inkhawih leh inkungkaihna nei lote an ni tih a sawi a, an khua a rawn sik avangin ringhlelin an test a, an positive tih hriat a ni, a ti. An pali hian Ningani vek han Guwahati-a MMC Hospital-ah dah nghal an i tih a sawi. 

Assam sorkar chuan lockdown avanga hmun danga an state mi tangkhangte chu a tahtawla  hruai haw a tum. Ningania  State Level Empowered Committee, COVID-19 meeting chuan hemi buaipui tur hian additional DGP (law and order) GP Sing kaihhruai committee a din. Committee chuan state chhung district danga tangkhangte hruai hawna turin bus chu Transport department ngaihtuah turin a ti bawk a, hemi atana senso hi National Health Mission (NHM) in a tum ang.