Nagaland : NPF Legislator lungawi loten Governor an dawr

Nagaland-a politics buaina chu chinfel a la ni lo a, kar kalta Inrinni khan Chief Minister Shurhozelie Liezietsu laka hel, Naga People’s Front (NPF) MLA-te chuan Governor P.B. Acharya an hmu a, ram danpui kenkawh an phut thu an thlen.

NPF bakah Independent legislator-te chuan Governor hi an dawr a, politics-a an buaina chingfel turin ram danpui khauh taka kenkawh an phut thu an sawi. Chief Minister hlui T.R. Zeliang leh Nagaland Lok Sabha member, Neiphiu Rio-te chuan legislator mi 43-te hi an ho a, an zingah hian NPF mi 36 leh Independent mi pasarih an tel a ni. Chief minister laka lungawi lo te hian Gauhati High Court, Kohima bench-in Shurhozelie Liezietsu-a floor test neih hun tur a stay sak chu ṭha an tih loh thu an sawi. Governor Acharya chuan an harsatna hrang hrangte a lo ngaihthlak sak bakah, a ṭul anga hma lakpui a tiam a ni.

Chief Minister Liezietsu hian tun hnai khan a cabinet minister pali-te chu a ban a, anni bakah hian Parliamentary Secretary mi 10 pawh ban an ni. CM-in a ban tak te hian lungawi lohna an lantir zui a, chief minister chu bang turin an phut a, hma an la zui mek a ni. NPF leh Independent legislator luingawi lote chuan CM paihthlak tum hian hma an la a, Governor hnenah an zualko a ni. Governor Acharya chuan Liezietsu chu July 15 hma assembly house-ah thlawptu a ngah tawk em tih fiah turin a hriattir a, mahse hei hi Gauhati High Court, Kohima bench chuan July 17 thleng atan a stay sak a, floor test hi buatsaih a la ni lo.

Liezietsu hian Justice L.S. Lima hnenah petition a thehlut a, Governor-in floor test nei tura hun a ruatsak chu hma lutuk leh, ram danpui kalh niin a lo sawi tawh. Liezietsu chuan July 29-a Northern Angami-I constituency by-election atan a inbuatsaih mek tih sawiin, hetih laia floor test lo buatsaih chu thil dik lo a ni, a ti. Hemi chungchang hi ngaihtuah a nih hnuah court chuan stay order hi a tichhuak a ni.

Nagaland politics buaina hi CM Liezietsu-a'n financial adviser atan a fapa a ruat aṭanga inṭan a ni. Liezietsu hian a fapa chu minister-te pawmpuina la loin cabinet status a pe a, an hlawh ang a hlawh ve bawk. He thutlukna avang hian cabinet minister leh MLA eng emaw zat chu CM lakah hian an hel a, hel zinga minister pali chu an nihna hlihsak an ni. Ban zingah hian Home Minister, Power Minister, National Highway and Political Affairs Minister leh Forest and Environment and Climate Change Minister pawh an tel a ni.

Hetih lai hian CM laka lung­­awilote chuan floor test hi buatsaih thuai an phut a, court-in stay order a tichhuak chu ṭha an tih loh thu an sawi. Liezietsu hi nimin khan Justice L.S.Jamir-a hmah a inlan a, floor test neih hun tur erawh puan a la ni lo.

No-Confidence Motion put luh theih a ni lo : Yitachu
Chief Minister Liezietsu paithlak tuma hma lak a nih mek lai hian, school education minister leh sorkar thupuangtu ni bawk Yitachuchuan Liezietsu lakah hian TR Zeliang-a'n no confidence motion a pulut thei lo tih a sawi. Minister chuan, "Zeliang-a hi NPF party mi leh sa ve mai a nih avangin CM lakah hian no-confidence motion a pulut thei lo a ni" a ti. NPF MLA-te chu motion pulut thei an nih zawk thu a sawi.

Shürhozelie chuan house-ah majority a la nei a, paihthlak theih a ni lo tiin, Shürhozelie hi house-ah leader-ah a ni a, chief minister post a a ruak lo,a ti bawk.

Minister chuan an buaina tawh mek chu party chhunga chinfel theih a nih thu sawiin, chief minister chu tihluihna hmanga paithlak tum a nih chu ṭha a tih loh thu a sawi. Liezietsu-a kaihhruai sorkarah state-in hma a sawn chho zel tih sawiin, mipuite pawhin sorkarah rinna an nghat ngam niin a sawi bawk. Hetih rual hian ram danpui palzut zawnga cetna reng reng thlawp lo turin a ngen a, dan chu mitin chunga leng a ni, a ti bawk.