Manipur sorkarin Journalist fund atan vbch 10 ruahman

Manipur Chief Minis­ter N Biren Singh chuan Manipur State Journalists Welfare Scheme hnuaiah journalist curpus fund atan cheng vaibelchhe 10 pek chhuah a nih thu a sawi.

Chief Minister Biren Singh chuan he thu hi 35th Journalist Award Ceremony a hmanpuinaah a sawi a, journalist-te hna thawh chu fakawm a tih thu a sawi. Sorkar hnathawh leh hmasawnna hrang hrangte, chhiatna thleng leh mipui hriat tur pawimawh puang­chhuaktu an nih vangin an hna chu a pawimawh hle tih a sawi. Chutih rualin dikna leh rinawm­na vawng reng turin journalist-te chu a chah a, an thiamna leh theihna te chu state-in hma a sawn theih nana hmang turin a chah bawk.

Biren Singh chuan BJP kaihhruai state sorkar chuan hmasawnna tur kawng hrang hrang a dap mek zel tih sawiin, sorkar policy leh programme duanah te rawtna thlen

ṭhin turin mipuite a chah. Mipuiten awlsam zawka sorkar mi pawimawhte an dawr theih nana People’s Day (Meeyamgi Numit) hman ṭhin chu mipuiten an hlawkpui tih sawiin, kalpui zel a nihn tur thu a sawi. People’s Day hi thla khatah vawi khat buatsaih ṭhin a ni a, Mi­nister MLA leh sorkar mi pawimawhte an ṭhu ṭhin a, mipuiten an dawr ṭhin a ni.

Ceremony buatsaihah hian Chief Minister chuan journalist mi panga hnenah journalism lama an hnathawh ṭhat avangin chawimawina a hlan. Print media bikah, Th. Premchand (Poknapham) chu 'best male journalist award' hlan a ni a, 'best female journalist award' chu Baby Serin (Ichel Express) hnenah hlan a ni. Electronic media-ah N. Sanajaoba (ISTV) chu best journalist award hlan a ni a, best appreciated DIPR personnel chu P. Romesh Singh hlan niin, Chirom Biren chuan best hawker award a dawng bawk. He hunah hian senior journalist-te chawimawina hun buatsaih a ni bawk.