Tripura-ah IPFT-te'n nawrh an chhunzawm zel

Tripura-a tribal party, Indigenous People’s Front of Tripura (IPFT)-te chuan state hran phuta nawrh an huaihawt chu an kalpui chhunzawm zel.

State sorkar chuan IPFT hruaitute chu Pathianni khan meeting a neihpui a, inremna siam a ni lo thung. Sorkar chuan IPFT-te chu an nawrh titawp turin a ngen a, mahse IPFT-te chuan an thil phut a hlawhtlin hma loh chuan nawrh tihtawp an tum loh thu an sawi. Ni eng emaw zat chhung nawrh huaihawt a nih tawh avang hian nunphung a khaihlak nasa hle a, inkalpawhna kawngpui khar a nih bakah, rel service pawh tihtawp a ni. Director General of Police Akhil Kumar Shukla chuan, IPFT-te hian sorkar laipui aṭanga thu lawmawm an dawn hma loh chuan nawrh hi chhunzawm zel an tum tih a sawi a, hetih rual hian boruak duhawm lo thleng a awm lo tih a sawi.

IPFT-te chuan an thil phut a hlawh tlin theih nana hma lak pui turin Union Minister of State Kiren Rijiju chu nimin khan an dawr a, sorkar laipuia mi pawimawhte dawr turin New Delhi an pan bawk. IPFT-te hian July 10 aṭang khan nawrh hi an huaihawt ṭan a, an duh ber chu state hran dina mahnia ro inrel a nih thu leh, Tripura Tribal Areas Autonomous District Council (TTAADC) area tihzauh a nih thu an sawi. An thil phut hi a hlawhtlin hma loh chuan an nawr zel dawn tih an sawi bawk.

Hetih lai hian opposition party, Congress chuan IPFT-te'n nawrh an chhunzawm zel a nih chuan state pumah an hmalakna duh lohna lantira nawrh huaihawt ve an tum thu an sawi. IPFT-te hmalakna chu an dem thu sawiin, mipui harsatna siam zawnga hmalakna reng reng chu an thlawp lo tih an sawi. Kawngpui dan a nih avanga nitin mamawh man sang chho zel chu pawi an tih thu an sawi a, tiam chin awm loa nawrh huaihawt titawp tura an phut thu an sawi bawk. Chief Minister Manik Sarkar chuan an harsatna tawh mek chungchangah hian Pathianni khan Union Home Minister Rajnath Singh chu a hmu a, hma lak pui turin a ngen a ni.