NIA-in hel pawl hruaitu lakah charge sheet an thehlut

National Investigation Agency (NIA) chuan kar kalta Inrinni khan, hel pawl United Liberation Front of Asom (ULFA) hruaitu mi pathum lakah charge sheet an thehlut.

NIA hian Guwahati-a Special NIA Court-ah charge sheet hi an thehlut a, heng hel hruaitu mi pathumte hian India sorkar lakah indo an puang tih an tarlang. ULFA commander-in-chief Paresh Baruah, chairman Paban Baruah leh Gagan Hazarika-te lakah charge sheet hi thehluh a ni. Gagan Hazarika hi police custody-ah dah mek a ni a, midang pahnihte erawh an awmna chin hriat a ni lo. Heng mite lakah hian Indian Penal Code (IPC) section - 17, 18, 18A, 18B leh 20 (Unlawful Activities (Prevention) Act, 1967) bakah, sections 121A, 124A, 120B leh 385 tlawhchhanin charge charge sheet hi theh luh anih thu tarlan a ni.

Kum 2013 khan Guwahati-a Special NIA Court-ah hian ULFA hruaitu ṭhenkhat lakah hian thubuai ziahluh a lo ni tawh a, an pawl hruaitu Paresh Baruah hming pawh a lang a ni. ULFA mi leh sa te hi tharum thawha che ṭhinah puh an ni. NIA chuan hel mi leh sa te hian tharum thawhna leh pawikhawihna an thlen ngei tih finfiah tawh a nih thu an sawi. Hetih lai hian Paresh Baruah hi Myanmar-ah a bibo nia sawi a ni a, Mukul Hazarika pawh hun eng emaw chen United Kingdom lamah a bibo nia tarlan a ni. NIA-te hian ULFA mi leh sa tho Drishti Rajkhowa pawh an chhuizui mek bawk.