Kota-a Tripura zirlai awmte haw phal turin dilsak

Tripura sorkar chuan Rajasthan-a Kota khaw district collector leh magistrate-te hnenah lehkha thawnin, he khuaa Tripura zirlai tangkhang mekte chu an state-a an kir phalsak turin a ngen. 

Education minister Ratan Lal Nath chuan Kota aṭanga Tripura zirlai hi a hma thei anga an  haw phalsak turin ngen a ni tih a sawi a, May 2 aṭang hian an chuanna tur bus pawh a chhuah theih beisei a ni tih a sawi bawk. Kota-a hian Tripura zirlai tangkhang mek hi 122 an awm a ni. 

Nath chuan state pawn lama tangkhang mek, Tripura-a haw duhte tan helpline number an siam thu sawi a sawi. An  haw theihna turin sorkar chuan an awmna state leh an paltlang tur state sorkarte a biaksak dawn a, mahse tangkhangte hian an motor hman turte erawh anmahnia an inbuaipui  a ngai ang, a ti. Minister chuan hmun danga tangkhangte hruai hawna tur senso hi a tam tham dawn a, state sum dinhmun an ngaihtuahin an tum sak thei lo tih a sawi. Mahse sorkar dang biak leh, ṭul dang lo buaipui sak kawngah theihtawp an chhuahsak zel dawn tih a sawi.