NESO hnuaia zirlai pawlten CAA duh lohna lantir

North East Students' Organisation (NESO) hnuaia zirlai pawlte chuan Nilaini khan Citizenship Amendment Act (CAA) duh lohna lantirin hmarchhak state hrang hrangah nawrh an huaihawt.

NESO chairman Samuel Jyrwa chuan, CAA bakah dan sakei tia sawi ṭhin, sipai hnena thuneihna sang pekna, Armed Forces Special Powers Act (AFSPA) chu sut tura an phut bakah, hmarchhak bial pumah Inner Line Permit (ILP) hman a phut bawk tih a sawi. Hei bakah hian 1951 census behchhana National Register of Citizen (NRC) leh, Assam Accord hman an phut bawk a ni.

Hmarchhak bial tan an culture leh history behchhana educational policy siam an phut thu Jyrwa chuan a sawi a, hei bakah 'Act East Policy' administrative centre pawh hmarchhakah din an duh thu a sawi bawk.

NESO chuan hmarchhak bial tan time zone hran siam turin sorkar laipui a phut bawk a, Myanmar ramchhung buaina thleng mek avanga raltlan, hmarchhak state hrang hranga lutte dinhmun pawh ngaihven sak turin an ngen tih an tarlang bawk a ni.

Assam
All Assam Students' Union (AASU) chuan state chhunga district headquarters tinah CAA duh lohna hi an lantir.

Guwahati-ah chuan AASU headquarters, 'Swahid Bhawan' kawtah zirlaiten nawrh an huaihawt a ni. NESO advisor Samujjal Bhattacharjee chuan Assam mipuite chuan CAA chu an pawm thei ngai dawn lo tih sawiin, sorkar laipui chu sut leh ngei tura an phut thu a sawi.

Bhattarcharjee chuan, "Hri leng vangin kum hnih chhung CAA dodalna hi kan lantir mumal thei lo a ni. Mahse tunah chuan CAA hi hman a nih lohna turin sorkar kan nawr chhunzawm leh thei tawh a ni," a ti. He dan siam hian Assam mipuite rilru a ti na a, sut a nih hma chuan an nawr zel dawn tih a sawi.

Assam-ah hian kum 2019 kumtawp lam leh 2020 kumtir lamah CAA dodalna hi pawl hrang hrangte nasa takin an lo lantir tawh a, nawrh huaihawtte leh police-te innawrbuainaah mi panga an lo thi tawh a ni.

Meghalaya
Meghalaya-ah pawh zirlai pawlten CAA dodalna hi an lantir.

Khasi Students' Union (KSU) chuan Shillong-a U Kiang Nangbah lim bulah lungawi lohna lantirin, Garo Students' Union chuan Tura-ah nawrh hi ah huaihawt ve bawk.

Zirlai pawlte hian CAA an duh lohna thuziakte kengin, CAA chu dan loa pem lutte tana siamsak a ni tih an sawi a, India ram venhimna turin hmarchhak bial chu venhim a ngai tih an sawi. Shillong-a nawrh huaihawtte hian 8th Schedule-a Khasi ṭawng an phutna thuziakte an keng tel bawk.

Kum 2019-a Meghalaya Assembly-in an state-a ILP hmanna tur a lo pass tawh, sorkar laipuiin tun thlenga a la tikhawtlai sak chungchang chu sawichhuakin, NESO chairman sorkar laipui chuan Meghalaya leh hmarchhak state dang leilung fate leh an culture humhalhna tur chu a ngaih pawimawh pui tak tak lo tih a sawi.

Nagaland
Naga Students' Organisation (NSF) chuan Kohima-a an office kawtah CAA duh lohna leh, an thil phut dangte tihhlawhtling tura phutna hi an lantir a ni.

NSF president Kegwayhun Tep chuan CAA hi Parliament-ah eptuten nasa taka an dodal chungin BJP sorkar chuan a pass lui a ni tiin, "Vawiinah he dan hi hman la ni lo mah se, BJP sorkar chuan inthlanpui neih leh hma ngeia hman a tum a ni. Hmarchhak mipuite chuan he dan hi kan bialah hman kan duh lo a ni," a ti.

Nikum December 4-a sipaiten civil mi eng emaw zah an kahhlum chungchang sawichhuakin, he thil thleng hian an rilru a la tina reng tih a sawi. Hmarchhak mipuite chuan AFSPA chu an duh lo takzet a, he dan hi hmarchhak state hrang hrangah sut vek a ngai a ni, a ti.