Assam : Thamna sum phuttu Education department official man

Assam-a Education department official pakhat chu thawktu pakhat hnenah thamna sum pe tura a phut avangin Nilaini khan man a ni.

Kamrup (Rural) district-a Block Elementary Education Officer, Lachit Basumatary lakah hian Directorate of Vigilance and Anti-Corruption-ah complaint thehluh a ni. Complaint thehluttu officer hian thamna a phut avangin office-a a hna pawh a pending sak niin a sawi.

Complaint thehluh hnuah Directorate of Vigilance and Anti-Corruption team chuan officer hi thil dik lo a ti lai man ngei tumin thang an kam zui a, Nilaini khan sum pe tura a phut hnen aṭanga pawisa a dawn hnuah an man ta a ni. Hei bakah hian a motor-ah pawisa fai, Rs nuai 1 hmuh a ni bawk a, a in pawh dap a ni nghal bawk.

Prevention of Corruption Act, 1988 (as amended in 2018)-a section hrang hrang hnuaiah Basumatary lakah hian thubuai ziahluh nghal a ni.