Meghalaya-in NE state dang aṬanga haw phalsak dawn

Meghalaya sorkar chuan hmarchhak state danga an state mi tangkhang mekte chu May 5 aṭangin an haw an phalsak dawn. 

Hmarchhak state danga Meghalaya mi tangkhang mek hi mi 10,000 chuang an awm. Heng tangkhang mek zinga haw duhte tan sorkar chuan online form thehluh tur a siam a, May 4 hmaa an thehluh a ngai dawn a ni. 

Online-a form thehlut thei lo, internet hmang lote tan phone hmanga biak theihna tur pawh a siam nghal bawk. 

Meghalaya sorkar chuan an state-a Covid-19 kai zinga mi pariat chu an dam ṭha tawh tih a sawi a, hri kai zinga pathum test report chu nghah mek a la ni tih a sawi bawk. Hri kai dam ta mi pariatte chu an inah ni 14 chhung inkhunghrang leh phawt tura tih an nih thu deputy chief minister Prestone Tynsong chuan a sawi. 

Ningani khan state sorkar chuan  district 11 zinga 10 chu hri kai awm lohna, green zone-ah a puang a, heng district-te hi inkalpawh pawh a phalsak tawh bawk. Meghalaya-ah hian hri kai hi mi 12 hmuh niin, mi pakhatin a thihpui a ni. Hri kai hmuhte hi East Khasi Hills district chhunga mi vek an ni.