Meghalaya-in fertiliser hman khapna hlip

Meghalaya sorkar chuan an state-a thlai thar 50% zeta a tlakhniam avangin lei tih ṭhatna, chemical fertiliser hman khapna a siam chu a hlip.

Deputy chief minister Prestone Tynsong chuan East Khasi Hills Farmers Assocation-te'n harsatna an tawh dante an hrilh tih a sawi a, loneitu pawlte nena an inkawm hmain sorkar chuan fertiliser khapna thupek hlih a nih thu a lo tichhuak tawh a ni, a ti.

Kum 2014 aṭang khan khatih laia Meghalaya sorkar chuan organic farming kalpui a nih theihna atan fertiliser supply hi a khuahkhirh a ni.

Deputy CM chuan, "Agriculture department-in census a neihah, fertiliser hman khap a nih aṭangin thlai thar chhuah hi 50% in a tlahniam tih hriatchhuah a ni," a ti.

Loneitute chuan sorkar hnenah kum 2014 hma lama subsidy a pek ang kha pe leh tura ngenin, sorkar pawh fertiliser-a 50% subsidy pek a remtih thu Tynsong chuan a sawi. Hemi rual hian loneitute chu fertiliser ringawta in nghat lo a, kawng dang pawh ngaihtuah turin thurawn a pe nghal bawk. "Chemical leh fertiliser hmang tur hian kan fuih dawn lo a, mahse tunah chuan an harsatna neih hi chinfel sak phawt an ngai a ni," tiin a sawi.

Fertiliser hman khapna a hlih hnuah, Meghalaya sorkar chuan Ministry of Chemicals and Fertilisers-ah supply tur hian ngenna a thlen ang.