Nagaland : FM-in CSR & Investment conclave a hawng dawn

Nagaland sorkarin Corporate Social Responsibility (CSR) and Investment conclave a buatsaih tur chu August 22 hian union finance minister Nirmala Sitharaman chuan a hawng dawn. He conclave hi Kohima-ah neih a ni ang.

Investment and Development Authority of Nagaland (IDAN) Chief Executive Officer Alemtemshi Jamir chuan Union Finance Minister hian Nagaland tan bika Investor and Bankers meet buatsaih pawh a telpui dawn tih a sawi.

Sitharaman hi August 22-ah Nagaland hi thlengin, August 24 thleng a cham dawn a ni.

Conclave hi July 4 leh 5-a neih tur khan ruahman a lo ni tawh a, mahse Union Minister hi a hman loh avangin a hun hi chawpchilh takin an sawn a ni. Jamir chuan conclave neih turah hian ramchhung hmun hrang hrang aṭangin corporate leh investor 100 chuangin tel an tum thu an tichiang tawh tih a sawi.

Jamir chuan conclave hi event pathumah ṭhen a ni dawn tih sawiin, CRS conclave, bankers meet leh investors meet neih a nih tur thu a sawi. Event an buatsaih tur hi Non Governmental organisations (NGOs) leh civil society organisations (CSOs) tan an hawng vek tih a sawi bawk.

July thlaa conclave neih tur atana an inbuatsaihnaah khan state sorkar chuan Rs vbc 2.5 vel a seng hman a, tun ṭumah hian Rs vbc 2.7 vel a seng leh dawn a ni. Finance Minister hian conclave ṭan hma ni chiahah a ṭhulh a, he huna tel tum corporate, investor leh banker-te chuan Nagaland hi an thlen hman vek tawh avangin state sorkar chuan conclave hi sawnin, precursor event a buatsaih ta zawk a ni.