Assam ṭhalai 1,000-te Cellular Jail tlawh tir dawn

India ram zalenna champha vawi 75-na lawmna, Azadi Ka Amrit Mahotsav peng pakhatah Assam sorkar chuan an state-a ṭhalai 1,000-te chu Andaman and Nicobar Island-a Cellular Jail a tlawh tir dawn.

Chief minister Himanta Biswa Sarma chuan a twitter-ah hei hi tarlangin, India ram zalenna tura beitu, an nunna hlantute inpekna hmuh tir a, heta ṭang hian ram hmangaihna rilru tuh a nih theihna atan ṭhalaite hi tirh an ni dawn tih a sawi. An kal hun tur tak erawh a la sawilang lo.

Port Blair-a Cellular Jail hian India Independence movement-ah hmun pawimawh tak a luah a, he hmun hi British awpna aṭanga India ram zalenna tura beitu, freedom fighter tam tak tanna hmun a ni.

He tan-in hi chhawng thuma sang niin, Britain sorkar khan kum 1896-ah sa ṭanin, 1906-ah a sa zo a ni. Building sakna atana leirawhchan hmante hi Burma aṭanga lakluh an ni. He hmunah hian India zalenna sualtu mi tam tak chuan nghaisakte an tawk a ni. Tunah chuan anmahni hriatrengna hmun atan hman a ni tawh thung.

Building hian wings pasarih neiin, a laiah tower a awm bawk a, heta ṭang hian guard-te chuan tangte hi an thlithlai ṭhin. Wing pasarihte hi chhawng thum vek niin, dormitory a awm lo a, tang dahna cell 696 a awm. Cell tin hi 14.8 ft × 8.9 ft-a zau niin, metre 3-a sangah ventilator a awm bawk.

India-in zalenna a hmuh hnuah building wings pahnih hi tihchhiat a ni a, mahse hei hi political leader hrang hrang leh, he hmuna lo tang tawhten sawiselin, an chanchin nuaibo tumna niin an sawi.

Kum 1979, February 11 khan khatih laia prime minister, Morarji Desai chuan Cellular Jail hi National Memorial-ah a puang a ni.