Nagaland-in local body inthlan buatsaih nan hun pek belh turin Supreme Court a ngen dawn

Nagaland sorkar chuan urban local bodies (ULBs) inthlan buatsaihna atan hun pek belh turin Supreme Court-ah ngenna a thlen dawn.

Inrinni liam taa chief minister Neiphiu Rio kaihhruai cabinet meeting-ah hemi chungchang hi rel a ni tih sorkar thupuangtu, parliamentary affairs minister Neiba Kronu chuan a sawi.

Kronu chuan cabinet meeting-ah hian advocate general KN Balgopal chuan July 29 khan Supreme Court-in state sorkar hnenah nakkum January thlaah municipal council inthlan buatsaih tura a hriattir chungchang a sawi. Advocate General hian Supreme Court chuan Municipal leh Town Council inthlanna hi January thlaah tifel vek turin a ti a ni, a ti.

Mahse cabinet meeting-ah hian inthlan neih hun tura tih chungchang hi ngaihtuah a ni a, December leh January thlate chu Nagaland-ah festive season a nih avangin, heng huna inthlan buatsaih loh chu mipuite duhdan pawh a nih tur thu an sawi.

Hemirual hian urban local body election atana electoral roll buatsaih pawh hma an sawn zel tih Kronu chuan a sawi bawk. Mahse Municipal Councils Dimapur, Mokokchung leh Kohima chuan inthlan hi an duh loh avangin an la tifel kim thei lo a ni, a ti. Municipal pathumte hian July 22 khan state sorkar hnenah memorandum an lo thehlut tawh a, Nagaland Municipal Act 2001 siamṭhat phawt an phut.

Kum 2017-a an state-a thil thleng ang kha a thlen nawn tawh lohna turin, state sorkar chuan inthlan inbuatsaihna atan hun tam zawk pe a, mipuiteah rinngamna siamsak phawt a duh a ni, tiin Kronu chuan a sawi.

Kum 2017 January thla khan Nagaland sorkar chuan ULB inthlan neih tur hi puangin, hmeichhiate tan seat 33% dah a nih tur thu a sawi a ni. Mahse state chhung hmun hrang hrangah lungawi lohna nasa tak a chhuak a, tharum thawhnate thlengin civil mi pahnih an thi a, sorkar office-te halin, Kohima Press Club pawh hal tel a ni bawk. Hei vang hian inthlan neih tur pawh hi ṭhulh a ni ta a ni.