Assam-a mobile internet tihtawp tum chungchang ennawn turin ngen

Assam-a Congress MP Pradyut Bordoloi chuan state sorkarin recruitment exam a buatsaih chhunga mobile internet service tihtawp a tum chungchang chu ngaihtuah ṭha turin a ngen.

MP Bordoli chuan chief minister Himanta Biswa Sarma hnenah lehkha thawnin, mobile internet service tihtawp chu mipuite'n an tawrh tel dawn avangin ngaihtuah nawn tura a duh thu a sawi.

Assam sorkar hian district hrang hranga Assam Direct Recruitment Examinations 2022 neih anih chhung, August 21 leh 28 hian darkar li chhung mobile internet service tihtawp a rel a ni. He examination hi Grade III leh Grade IV post 30,000 dawn hnawhkhahna tura buatsaih a ni. State chhunga district 35 zinga district 25-ah exam hi neih a ni.