Agartala-ah Maharaja Bir Bikram lim din dawn

Tripura sorkar chuan state khawpui, Agartala-ah Maharaja Bir Bikram Manikya lim a din dawn.

Chief minister Manik Saha chuan Maharaja Bir Bikram an zahna lantirna atan Agartala khawpui laili lai, 'Kaman Chowmuhani' bulah a lim hi din a nih tur thu a sawi.

Maharaja Bir Bikram hi Tripura-a MBB college, Airport leh institution dang tam tak, bank leh treasury thlenga dintu a ni a, kum 1947 khan kum 39 mi chauh niin a thi a ni.

CM chuan Maharaja chu hmathlir ṭha tak nei lal leh, modern Tripura ruangam dintu a nih thu sawiin, an state-ah zirna sang zawk zir theihna turte siam a duh a, university leh medical college dinte a duh a ni, a ti. "Mahse a boral hma avangin a hmathlir neihte a tihlawhtling vek hman lo a ni. A hnathawh ṭha tak takte hmuh tur an awm a, hengte hi kan hriatsak chhunzawm zel a, lal chhungkuate laka zahna kan lantir ve a ngai a ni," tiin CM chuan a sawi.