Presidential Poll : Nagaland CM polling booth-a a luh remti lo

India president thlanna chu Thawhṭanni khan ram pumah neih a ni a, hetih lai hian Nagaland Chief Minister Shurhozelie Liezietsu chu vote thlakna polling booth-ah a luh an phal lo a, vote pawh a thlak ve lo.

Liezietsu hi kumin February thla khan chief minister atan lakluh a ni a, mahse MLA a nih loh avangin vote a thlak ve thei lo a ni. Hemi a nih avang hian assembly-a vote thlakna polling booth-ah pawh security-te chuan a luh ve an remti lo a ni. Hemi chungchangah hian Chief Minister chuan, "Sorkar hotu lu ber ka nih avangin vote thlakna leh a bul hnaia security kalpui dan te ka enkual a, nimahsela security-te chuan Assembly-a ka lut tur chu hnung lam aṭangin min rawt pawt a, luh an remtih loh thu min hrilh a ni. He thil thleng hi a pawi ka ti a, security-te chetdan hi a zahawm loh hle a ni" tiin a lungawi loh thu a sawi.

Liezietsu hi chief minitser ni mah se MLA a ni lo a, a fapa Khriehu Liezietsu chuan seat kianin July 29 khian by-election a hmachhawn dawn a ni. Election atana a inbuatsaih mek laiin harsatna lian tak a tawk zui a, a laka lungawi lote chuan paihthlak tumin an bei mek a ni. CM lakah hian Naga People’s Front (NPF) leh Independent MLA eng emaw zat an hel a, chief minister aṭanga bang ta TR Zeliang-a CM a nih leh theih nan hma an la mek a ni. Liezietsu hian thlawptu a ngah tawk tih fiah turin floor test a hmachhawn dawn a, a hun tur erawh hriat a la ni lo.

Thawhṭannia vote thlakah hian chief minister laka hel NPF MLA 44-te chuan BJP kaihhruai NDA presidential candidate Ram Nath Kovind an vote a, Independent MLA pariat-in an vote ve bawk. NPF-te hian Ram Nath Kovind an vote tur thu hi an lo puang lawk tawh a ni. Assembly member 60 awmna Nagaland-ah hian vote 59 a tla a ni.

Assam-ah vote 127 a tla

Assam-ah chuan president thlanna hi boruak muanawm tak hnuiah neih a ni a, MLA 124 leh MP 3-te chuan vote an thlak a ni. Assembly-a Central Hall-ah vote hi thlak a ni a, zing dar 10 aṭanga ṭanin tlai dar 2-ah khar a ni. Chief Minister hlui Tarun Gogoi chuan New Delhi-ah vote a thlak a ni.

Lok Sabha MP - Badruddin Ajmal, Sirajuddin Ajmal leh Radheshyam Biswas-te pawhin Delhi-ah hian vote an thlak bawk. Assembly Principal Secretary Mrigendra Kumar Deka chuan boruak muanawm tak hnuaiah vote thlaka nih thu sawiin, rorel lai Bharatiya Janata Party leh a thawhpui, Asom Gana Parishad leh Bodoland People’s Front-te chuan National Democratic Alliance candidate Ram Nath Kovind an vote tih a sawi a, hetih lai hian Congress leh AIUDF-te chuan opposition candidate Meira Kumar an vote thung.

Arunachal Pradesh

BJP thuneihna state Arunachal-ah pawh MLA-te'n boruak muanawm tak hnuaiah vote an thlak a, MLA 58-te'n an state-ah vote an thlak. Hetih lai hian Health and Family Welfare Minister Jomde Kena chuan New Delhi-ah vote a thlak thung. Aruanchal assembly-ah hian seat 60 a awm a, Pakke-Kessang constituency MLA Kameng Dolo chu, Supreme Court-in 2014 assembly election kaihhnawiah thiam loh a chan tir avangin vote a thlak ve thei lo. AP-ah hian Bharatiya Janata Party chuan MLA 47 an nei a, Peoples Party of Arunachal (PPA) leh MLA dangte pawhin National Democratic Alliance nominee Ram Nath Kovindm an vote nia tarlan a ni. Hetih lai hian Chief Minister hlui Congress hruaitu lawk Nabam Tuki chuan Congress nominee Meira Kumar a vote thung.

Tripura, Meghalaya, Manipur, Sikkim

tripura-ah chuan Congress MLA hel leh Trinamool Congress (TMC) MLA parukte chuan NDA presidential nominee Ram Nath Kovind an vote. Additional Chief Electoral Officer Debashish Modak chuan vote thlak hi buain awm loin zawhfel a nih thu a sawi. Hetih lai hian Assembly Speaker Ramendra Chandra Debnath chuan West Bengal-ah vote a thlak a, Kolkata lamah a inenkawl mek vang a ni. Tripura Parliament member mi pathum te pawhin New Delhi-ah vote an thlak a ni.

Hetih lai hian assembly member 60 awmna Meghalaya-ah chuan MLA pariat-in vote an thlak lo. Congress MLA Kennedy Khyriem leh minister Martin M. Danggo-te chu vote thlak lo zingah an tel a, Parliamentary Secretary Justine Dkhar pawh a tel bawk. Dam lohna leh chhan dang vanga vote thlak lo an nih thu tarlan a ni a, hetih rual hian Independent MLA Julius Kitbok Dorphang-a chu naupang pawngsual kaihhnawihah thiam loh chan tir a nih avangin jail-ah a tang mek a, vote a thlak ve lo. Chief Electoral Officer Frederick Roy Kharkongor chuan United Democratic Party (UDP) leh Hill State People’s Democratic Party (HSPDP) MLA ṭhenkhat chuan naupang kum tling lo khuaikhemna thleng duh lohna lantirin vote an thlak lo tih a sawi bawk.

Silkim-ah chuan MLA 32 zinga 30-in president thar tur thlangin vote an thlak a, harsatna thleng a awm hriat a ni lo. Assembly-a vote thlak a nih hma hian an state chief minister hlui Nar Bahadur Bhandari sunna pualin ngawi rengin minute hnih an ding a ni. Manipur-ah pawh venhimna khauah tak hnuaiah vote thlak a ni a, MLA 60-te chuan an vaiin vote an thlak vek a ni.