AP border bulah China sipaite an drill

China sipaite chu tun hnia khan Arunahcal Pradesh border bulah an drill a, live-fire exercise an nei a ni.

China sipaite chettlat­na hmun hi India, China leh Bhutan inrinna, Sikkim sector-a Dokalam area nia tarlan a ni. People’s Liberation Army (PLA) chuan live-fire exercise hi Southwest China, Tibet Autonomous Region huam chhungah neih niin a tarlang thung. Tarlan dan chuan China sipaite hi India aṭanga Bangladesh-a Brahmaputra lui luan luhna bul hnaiah pawh an chetla a ni. Video aṭanga a landan chuan sipaite hian anti-tank grenade leh bunker beihna chi missile bakah howitzer pawh an enchhin nia tarlan a ni bawk. Drill hi darkar 11 chhung an nei a, sipaite hian China siam ralthuam an test nia sawi a ni.

India leh China-te hi tunhnai khan Sikim sector-a Dokalam area-ah an lo inep tawh a, an boruak pawh a sang hman hle nia tarlan a ni. China sorkar chuan Dokalam-ah hian kawngpui siam a tum a, hei hi India sipaite chuan dangin an inkarah hian buaina a chhuak zui ta a ni. China chuan India chu a sipaite hnukkir thuai turin a lo hriattir tawh a ni. India leh China inrinna hi km 3,488 zeta thui a ni a, ramri leh a chheh velah ram pahnihte hi an innghirngho fo a ni.

Hetih lai hian tun hnaia media-a China sipai-te'n India sipai eng emaw zat an kaphlum anga tarlan chu India chuan a pha thung a, thu belhchian dawl lo a nih thu a sawi. Hemi chungchang hi Pakistani Media chuan a tarlang a, China sipai kuta India sipai 158 an thi niin a sawi. Mahse hei hi India chuan thudik lo a nih thu a sawi a, Ministry of External Affairs thupuangtu Gopal Baglay chuan thu belhchian dawl lo leh, dawt hlawm hlak a nih thu a sawi. Hemi chungchanga China Central Television-in video footage a tihchhuah pawh a dik lo tih a sawi bawk. Ram pahnih sipai aiawhte chuan buaina chingfel tur hian inbiakna an lo nei tawh bawk.