Nagaland : Floor test-ah CM Liezietsu inlan duh lo CM thar atan Zeliang la lut

Nagaland chief minister Shurhozelie Liezietsu-a'n floor test a hmachhawn hun tura ruat chu nimin kha a ni a, mahse CM hi a inlan duh lo. Nimin vek khan T.R Zeliang chu Nagland Chief Minister atan Governor PB Acharya chuan rinawmna thu tiam tirin a la lut. Zeliang hi nimin chawhnu dar 3 khan lakluh a ni a, July 22 khian House-ah thlawptu a ngah tawk em tih fiah turin floor test a hmachawn ang.

Hemi chungchangah hian Raj Bhawan chuan thu­chuah siamin, "Chief minister Dr. Shurhozelie chu floor test hmachhawn tura a inlan loh avangin, ram danpui Article 164 tlawh ṭchhanin a nihna aṭanga paihthlak a ni a, a aiawh turin TR Zeliang chu lakluh nghal a ni" a ti. Governor PB Acharya chuan Thawhlehni khan assembly speaker Imtiwapang chu Ningani zing dar 9:30am-a special session ko turin a hriattir a, CM chuan house-ah thlawptu a ngah tawk em tih fiah tura floor test buatsaih turin a ti a ni. Special session hi koh a ni a, fiahna hmachhawn tur chief minister Liezietsu ber a inlan loh avangin inkhawm hi tihtawp leh nghal a ni. Session-ah hian chief minister hlui TR Zeliang leh NPF MLA-te chu an tel a, mahse Liezietsu a inlan tak loh avangin speaker Imtiwapang chuan inkhawm a titawp zui a, hemi chungchang hi Governor a hriattir nghal bawk.

Governor PB Acharya chuan CM Liezietsu hi July 15-ah floor test hmachawn turin a lo hriattr tawh a, mahse hei hi CM chuan khing letin floor test a neih hun pawh sawn hlat a ni. Liezietsu hi Gauhati High Court, Kohima Bench-ah a zualko a, court chuan floor test neih hun tur hi July 17 thleng atan a tihkhawtlai sak a ni. Mahse Governor thupek angin nimin khan floor test nei turin special session koh a ni ta tho a, chief minister Liezietsu erawh a inlan chuang lo a ni.

CM Liezietsu lakah hian MLA eng emaw zat an hel a, an party Nagaland Peoples Front (NPF) mi leh sa te pawhin CM hi an thlawp lo nia sawi a ni.

Nagaland assembly-ah hian member 59 an awm mek a, heng zinga MLA 43 zet chuan CM hi an thlawp tawh lo a, an zingah hian NPF MLA 36 leh Independent MLA pasarih an tel a ni. Hetih lai hian BJP MLA pali-te pawhin CM an thlawp loh thu hi an sawi a, Nagaland BJP president Visasolie Lhoungu chuan Thawhlehni khan Governor hnenah TR Zelianga an thlawp thu ziakin a thlen a ni. BJP leh NPF-te hi rorel lai Democratic Alliance of Nagaland (DAN) sorkarah an thawk ho a ni.

Buaina inṭan dan

Liezietsu hian a fapa Khriehu chu a Advisor (Finance) atan a ruat a, legislator-te remtihpuina la loin cabinet minister status pe in, an hlawh ang a hlawh bawk. Liezietsu hian a cabinet minister pali - Home Minister Yanthungo Patton, Power Minister Kipili Sangtam, National Highway and Political Affairs Minister G. Kaito Aye leh Forest and Envi­ronment and Climate Change Minister Imkong L. Imchen-te chu an nihna aṭangin a ban. Hei bakah hian parliamentary secretary mi 10-te chu a ban bawk a, a chetdan hian dem a hlawh hle. Hemi chungchang hi NPF Disciplinary Action Committee pawhin a lo ngaihtuah tawh bawk.

Zeliang-a thlawptu MLA 41-te chu Assam-a Kaziranga National Park-ah an camp a, sorkar thar a din theih nan hma an la a ni. MLA-te chuan sorkar thar din turin Governor Acharya sawmna an nghah thu an sawi. T.R. Zeliang pawhin Governor hnenah Chief Minister ni leh turin thlawptu a ngah tawk tih a sawi a, NPF leh Independent MLA aṭangin thlawptu a ngah tawk thu a sawi. Thawhlehni khan BJP MLA pali-te chuan Zelianga an thlawp thu hi an sawi ve leh bawk.