Assam CM-in Modi hnenah ngenna thlen

Assam Chief Minister Sarbananda Sonowal chuan Thawhlehni khan Prime Minister Narendra Modi a hmu a, tuilian avanga harsatna an tawh ṭhin sutkian a nih theih nana hma lak pui turin a ngen.

Assam CM chuan Modi-a chu tuilian avanga chhiatna thleng ṭhin venna tur hian ‘Prime Minister’s Special Programme for Flood and Erosion Control’ duang turin a ngen. Sonowal chuan tuilianin a tihbuai ṭhina awmte himna turin bang km 5,000 vel zeta thui siam an duh thu sawiin, hma lak pui turin a sawm a ni. Hei bakah hian kumin chhungin an state chhungah tuilian tuar mi nuai 25 chuang an awm tawh thu leh relief camp leh distribution centre 1,098 din a nih tawh thu a hrilh bawk. Sonowal hian Modi hnenah hian memorandum a thehlut a, Ministry of Water Resourcesaṭanga tuilian tuarte chhawmdawlna tur sum, cheng vaibelchhe 1,138 pek chhuah thuai an duh thu a thlen. Prime Minister chuan Assam CM hi an theih anga hma lakpui a lo tiam ve bawk.

Assam-ah hian tun dinhmunah tuilian tuar mi nuai eng emaw zat an la awm a, chhiatna hrang hrang thlengah mi 60 chuang an thi tawh. Assam State Disaster Management Authority (ASDMA)-te chuan district 17-a mi nuai sarih vel zetin harsatna hi an la tawk tih a sawi a, Thawhṭanni thleng khan mi 65-in nunna an chan tawh tih an tarlang.