Tripuar-ah Congress-te'n bandh huaihawt

Tripura-a opposition party Congress-te chuan nimin khan darkar 24 awh bandh an hauihawt a, nunphung a khaihlak phah hle.

Congress party chuan state hran phuta tribal party, Indigenous People's Front of Tripura (IPFT)-te'n inkalpawhna kawngpui pawimawh an dang chat leh, rel service an titawp chu an dem thu an sawi a, an hmalakna duh lohna lantira banh hi huaihawt an nih thu an sawi. IPFT-te hian state hran pek phutin ni eng emaw zat chhung rel leh motor kawngpui an dang chat tawh a, hei hian mipui tan harsatna nasa tak a thlen a ni. Hei hi Congress chuan ṭha an tih loh thu leh, hemi duh lohna lantira nawrh huaihawt an tum thu hi an lo sawi lawk tawh a ni. Congress thuchhuah chuan, central-a rorel lai Bharatiya Janata Party (BJP) chu IPFT-te nawrh huaihawt titawp thuai tura hma la turin an phut thu an sawi a, state-a rorel lai Communist Party of India-Marxist (CPI-M) pawh remna zawnga chak zawka hma la tura an phut thu an sawi.

Police-te chuan nimina bandh huaihawtah hian Congress activist mi 300 vel man an nih thu an sawi a, sorkar office, school leh sumdawnna hmun te pawh khar a nih thu an sawi. Lirthei che vel hmuh tur a awm meuh lo a, mahse hei hian Agartala aṭang thlawhtheihna thlawk chhuakte chu a ngawng loh thu an sawi. Deputy Inspector General of Police Arindam Nath chuan bandh avang hian boruak duhawm lo thleng a awm loh thu an sawi. Tripura Pradesh Congress President Birajit Sinha pawhin mipuiten an thlawp ṭhat thu a sawi a, lawmthu a sawi a ni. Hetih lai hian BJP Vice-President Subal Bhowmik chuan Congress-te thil tih hi an party chuan an dem takzet tih a sawi a, mipuite harsatna belhchhahna mai a ni, a ti.

Home Department official chuan Chief Mi­nister Manik Sarkar chu an harsatna tawh mek chingfel tur hian Union Home Minister Rajnath Singh leh Union Minister for Home Affairs Kiren Rijiju-te hma lak pui turin a ngen tawh tih a sawi. Rijiju chuan nawrh huaihawt avanga harsatna thleng mek chungchangah hian IPFT hruaitute chu inbiakna neihpui a tum thu a lo sawi tawh a, mahse tun thlengin inbiakna hi neih a la ni lo. Tripura Governor Tathagata Roy pawh harsatna chinfel a nih thuai theih nan hma la tura ngen a ni bawk.

IPFT-te hian state hran phutin July 10 aṭang khan Tripura chakkhai lamna National Highway 10 leh rel kawngte chu an dang chat a, tun thlengin hawn an la ni lo. General Secretary Mevar Kumar Jamatia leh front’s youth wing President Dhananjoy Tripura-te chuan an thil phut a hlawhtlin theih nana hma la turin kar liamta khan New Delhi an pan a ni. IPFT-te hian state hran an phut bakah, Tripura Tribal Areas Autonomous District Council (TTAADC) area chu zauh an phut bawk.