Assam-Meghalaya : Ramri chungchanga inbiakna chhunzawm
Assam leh Meghalaya chief minister-te chuan state ramri chungchanga buaina an la neihna hmun paruka inremna siam dan kawng zawngin, Pathianni khan inbiakna an nei.
State pahnihte hian ramri buaina an neihna hmun 12 zinga hmun parukah kumin March 29 khan inremna an lo ziak tawh a, a thawh hnihna atan a dang hmun paruka inremna siam tumin hma an la ṭan leh a ni.
Pathiannia Guwahati-a Assam chief minister Himanta Biswa Sarma leh Meghalaya chief minister Conrad K Sangma-te meeting neih hi border issue-a CM meeting an neih ṭum kua-na a ni.
A hmaa an lo kalpui tawh angin, state pahnihte hian regional-level committee pathum din an rel leh a, heng committee-te hian cabinet minister-ten an ho ṭheuh ang. Anni bakah hian Karbi Anglong Autonomous Council (KAAC) member pawh telh an ni dawn bawk a ni. Tun ṭuma inremna siam an tumna hmun paruk zinga pathum hi KAAC huamchhunga awm a ni. Ni 15 chhungin committee hi din fel hman an rel a ni.
Regional committee din hian ramri te hi tlawhin, tualchhung mite pawh an kawm kual dawn a, an pawm tlan theih tur inremna siam dan an ngaihtuah dawn a ni. State pahnih chief minister-te pawhin buaina an neihna hmun hi an tlawh ve dawn bawk a, ramri hrula chengte chu an kawm bawk ang. Chief Minister-te hian a ṭul dan angin regional committee-te hi hmuin, thurawnte an pe bawk ang.
A thawh hnihna atana state pahnihten an buaina chinfel an tumna hmunte hi - Khanduli and Psiar, Block 1 and Block 2, Borduar, Langpih, Nongwah – Mawtamur leh Desh Doomreah-te an ni.
Assam aṭangin Meghalaya state hi kum 1972 khan din a ni a, state pahnihte inrina hi km 884.9-a thui a ni. Ramri chungchangah state pahnihte hian kum tam tak chhung buaina an nei tawh a ni. Kumin kumtir lama buaina an neihna hmun parukah inremna an siamah khan 'give and take' policy hmangin, an ram inchuh, km 36.79 aṭangin Assam-in km 18.51 changin, Meghalaya lamin km 18.28 a chang thung.
Assam-AP ministerial level talk nei
Assam leh Arunachal Pradesh chuan ramri buaina chinfel dan ngaihtuahin nimin khan Namsai, Arunachal Pradesh-ah ministerial-level talk an nei.
Arunachal Pradesh palaite hi deputy chief minister Chowna Mein-a'n a ho a, Assam lam hi cabinet minister Atul Bora-a'n a ho thung.
July 15 khan Assam chief minister Himanta Biswa Sarma leh Arunachal Pradesh chief minister Pema Khandu-te chuan state pahnihte ramria buaina an neihte chinfelna tur hian inremna, Namsai declaration an lo ziak tawh a ni.