Congress-in Tripura-ah President's rule puan phut

Tripura-a eptu pawl, Congress party chuan BJP sorkarna hnuaiah an state-ah dan leh thupekin awmzia a nei lo a, eptu party member-ten beih an tawk reng nia sawiin, President's rule puan an phut tih an sawi.

Congress party thupuangtu leh in-charge Tripura affairs, Ajoy Kumar chuan Tripura-a politics thila tharum thawhna thleng fo chu High Court judge ṭanglai chhui tir an phut tih a sawi bawk.

"Congress party worker-ten beih an tawh fo leh, tualchhung boruak ṭha lo takte thlirin, sorkar laipui chu Tripura-ah President's rule puang turin kan phut a ni," tiin Kumar chuan a sawi.

Prime minister Narendra Modi chu Tripura-a rorellai, BJP-in eptu party worker-te bei leh, an chunga tharum thawhna an thlen fo chhan chu Lok Sabha-ah sawifiah tura an phut thu Kumar chuan a sawi bawk. Tripura-ah hian Congress party worker 100 chuang zet chuan beih an tawk tawh a, hei bakah an party office 50 beih a ni tawh bawk niin a tarlang

Tripura Congress hruaitu, Sudip Roy Barman chuan BJP mi leh sa lam aṭanga vauna an tawh reng avangin Congress party chuan rally leh meeting pawh an nei thei lo a, sorkar laka lungawi lohna telte an worker-te chuan beih an tawk zel bawk tih a sawi ve bawk. "BJP-in Tripura-a thla 52 ro a rel chhungin tualthahna thleng ziahluh 604 zet a awm tawh a, hetih laia tualthat ngei nia lang tam tak chu mahni intihlum anga ziahluh an ni bawk. Police-te chuan misualte zawk chu venhimna an pe a ni," a ti.

Congress party-in an puhnate hi BJP lam chuan an la chhang lo.