NSCI(IM) in an thil phut sawhsawn an tum lo

National Socialist Council of Nagalim-Isak Muivah (NSCN-IM) chuan sorkar laipui nena Naga political issue chungchanga inremna kawng zawnga inbiakna an neihah, Naga tana flag leh constitution hran an phutna chu sawhsawn an tum lo tih an sawi nawn leh.

Kum 20 chuang zet remna zawnga sorkar laipui nena inbiakna nei tawh, NSCN-IM chuan inremna siamna turah hian Naga flag leh constitution chu an dah pawimawh hle tih an sawi a, hei vang hian Naga national identity an phutna hi eng kawng mahin an thlak danglam dawn lo tih an sawi a ni.

Kum 2015 khan Naga buaina chinfelna tur hian NSCN(IM) leh sorkar laipui chuan framework agreement an lo ziak tawh a ni. Hei hi kum 18 chhung, inbiakna ṭum 80 chuang a neih hnuah an siam a ni. Mahse sorkar lam hian flag leh constitution hran an phut hi a pawmpui theih loh avangin inremna tluantling hi an la ziak thei lo.

Sorkar laipui hian kum 2017 aṭang khan pawl pasarih awmna, Naga National Political Groups (NNPGs) chu a hranin inbiakna a neihpui bawk.