Nagaland : NPF-in an party aṭangin CM Zeliang-a hnawt chhuak

Naga People’s Front (NPF) hruaitu hlun leh Nilaini-a cheif minister atana lakluh T.R. Zeliang chu kum ruk chhung atan NFP chuan an party aṭangin an hnawtchhuak tih an tarlang.

NPF working president Huskha Yepthomi chuan thu­chhuah siamin, CM Zeliang-a chu thuneihna duh avanga NPF kaihhruai Democratic Alliance of Nagaland (DAN) sorkar paihthlak tum leh, party president Lieziets-a thuneihna chhuh tuma a chet avangin party aṭanga hnawhchhuah a ni, a ti. Zeliang-a chetdan hi party leh state sorkar tana thil pawi tak a ni a, tun hnuah chuan thleng tawh lo se a duh thu a sawi bawk.

State Governor P.B. Acharya chuan Shurhozelie Liezietsu-a kaihhruai sorkar chu ṭhiah a nih thu Nilaini khan a puang a, CM hlui Liezietsu chu House-ah thlawptu a ngah tawk em tih fiah tura floor test buatsaih-ah a inlan loh avangin CM a nihna

aṭanga paithlak a nih thu a sawi. Acharya chuan Liezietsu hian ram danpui Article 164, Clause (I) a bawhchhia tih sawiin, amah leh a kaihhruai sorkar chu ṭhiah a ni, a ti. Liezietsu-a paihthlak a nih rual hian NPF MLA, TR Zelianga chu chief minister thar atan lakluh nghal a nih thu a sawi bawk. Kum 65 mi Zeliang hi Nagaland chief minister 19-na atan, Raj Bhavan-ah rinawmna thu tiam tira lakluh a ni. Zeliang hian sorkar thar din turin House-ah thlawptu a ngah tawk em tih fiah turin, July 22 hian floor test a hmachhawn ve leh dawn a ni.

Chief Minister hian floor a hmachhawn a, sorkar thar din tura thlawpu a ngah bawk chuan a council of minister tur a ruat nghal thei tawh dawn a ni. Zeliang hi kumin February thla khan tribal-te nawrna avangin CM a nihna aṭangin a bang a, thla nga hnuah lahluh leh a ni ta a ni. Zeliang hian NPF MLA 35, BJP (4) leh Independent MLA (7)-te thlawpna a hmu nia tarlan a ni a, hei hi floor test-ah a dik reng em tih finfiahin a awm dawn a ni. Hetihrual hian Zeliang-a hi NPF-in an party aṭanga an hnawhchhuah leh tak avangin, hetiang zat thawptu hi a nei dawn em tih chu a chiang thei ta lo a ni.

Liezietsu-a thupuangtu Yitachu chuan, floor test hma­chhawn turin hun pek an nih loh thu a sawi. Yitachu chuan, "Governor-in Nilaini-a special session a koh kha a chawpchilh hle tih sawiin, kha tih lai khan Kohima-ah kan awm lo a, Liezietsu pawh floor test hmachhawn turin a inlan hman lo a ni" a ti. Assembly special session neih tur chu Thawhlehni zanah an hre chauh tih sawin, a tuk zing dar 9 :30 ah session hi ṭan a ni a, tel hman ngaihna a awm lo a ni, tiin floor test chu chawpchilh taka buastaih a nih thu a sawi.He thil thleng hi an hrethiam lo takzet tih sawiin, hemi chungchang hi NPF chuan an party chhungah an chingfel dawn niin a sawi bawk. Zelianga thupuangtu Tokheho Yepthomi ve thung chuan, "Liezietsu hian floor test a hmachhawn loh avangin dan a bawhchhia a, a inthiarfihlim mai tur a ni" a ti thung.

NPF party thupaungtu Tokheho Yepthomi chuan NPF MLA-te chuan meeting an nei tih sawiin, an party president, Shürho­zelie Liezietsu-a chetdan chu an dem thu leh, thu neihna inchuha TR Zeliang-a nena an inbeih dan chu party chuan a dem takzet tih a sawi. Liezietsu leh Zeliang-a te chetdan hi party kalh a ni a, an chungchang hi pary pawhin a ngaihtuah leh dawn tih a sawi. Hetih lai hian NPF MLA-te chuan Zeliang-a an thlawpna hi an hnukkir dawn lo nia sawi a ni a, sorkar thar din turin an thlawp dawn tih tarlan a ni.