Assam CM-in tuilian tuarte tan ṭanpuina dil

Assam Chief Minister Sarbananda Sonowal chuan an state chhunga tuilian tuar nuai 25 vel te tan Union Finance Minister Arun Jaitley hnenah Nilaini khan ṭanpuina a dil sak.

Assam chief minister chuan district 29-a cheng mi nuai 25 vel zetin tuilian vangin harsatna an tawk tih Union Finance Minister Arun Jaitley a hrilh a, heng mite chhawmdawlna tur hian ṭanpuina sum ruahman sak turin a ngen. Arun Jaitley chuan Assam-a tuilian tuarte chu a tawrhpui thu sawiin, Flood Management Programme (FMP) leh Rural Infrastructure Development Fund (RIDF) aṭangin ṭan­puina sum ngaihtuah sak an nih tur thu Assam CM hi a hrilh ve bawk. Sonowal chuan ṭanpuina sum hi cheng vaibelchhe 1,138 a dil nia tarlan a ni.

Assam State Disaster Management Authority (ASDMA) chuan kumina tuilian hi a nasa hle tih a sawi a, nunna chan pawh mi 73 an awm tawh tih a sawi. Lakhimpur, Biswa­nath, Nalbari, Barpeta, Bon­gaigaon, Dhubri, Goalpara, Morigaon, Nagaon, Gola­ghat, Jorhat, Sivasagar, Karimganj leh Cachar district-te chu tuilian tuar nasa zual an ni. Hetih lai hian tuilianin ram zau tak a chim tawh avangin ramsate chuan himna zawngin hmun dang an pan a, sai 40 vel zet chu Meghalaya ram chhungah an lut tawh tih tarlan a ni. Saite hi North Garo Hills district-ah an lut a, hei hi a bul hnaia chengte tan a him lo hle nia tarlan a ni bawk.