Tripura : IPFT-te'n nawrh an titawp

Tripura-a tribal party, Indigenous People’s Front of Tripura (IPFT)-te chuan July 10 aṭanga tiam chin awmloa nawrh an huaihawt chu nimin khan an titawp.

IPFT-te hian state hran pek phutin motor kawngpui leh rel kawngte an dang chat a, hei hian harsatna a thlen nasa hle. Chakkhai lamna kawng­pui pawimawh National Highway leh rel kawng dan a nih avang hian mi tam takin harsatna an tawk a, buhfai, oil leh nitin mamawhte duh anga hmuh tur a awm lo a ni. IPFT-te chet dan hi opposition party Congress chuan an dem thu an sawi a, hemi duhlohna lan­tir hian Thawhlehni khan bandh an huaihawt ve bawk. Congress party chuan IPFT-te nawrh huai­hawt hi mipuite tana hasratna nasa takl thlentu a nih vangin tawpsan thuai tura nawr nan bandh hi huaihawt an nih thu an sawi.

West District Police Chief Abhijit Saptarshi chuan, buaina leh boruak duhawm lo lutuk thleng loin IPFT-te chuan nimin zing aṭang khan nawrh hi an titawp tih a sawi. IPFT President Narendra Chandra Debbarma chuan an thilphut chungchangah sorkar laipuiin inbiakna neih a remtih tak avangin kawngpui an dan chah chu an tawpsan tak thu a puang. Debbarma chuan an thil phut chungchanga Governor Tathagata Roy-a hmalakna chu fakawm a tih thu sawiin, an thil phut te chu Governor hian sorkar laipuiah a thlen sak niin a sawi. Sorkar laipui leh IPFT-te hian kar leh chhung khian inbiakna hi an nei dawn nia tarlan a ni.

IPFT-te hian kum 2009 aṭang khan state hran phutin sorkar an lo nawr ṭan tawh a, tun thlengin an la hlawhtling lo a ni. IPFT thuchhuah chuan, Tripura Tribal Areas Autonomous District Council (TTAADC) chu tihhmasawn a, mahnia ro inrela state hran nih an duh tih an sawi. TTAADC area zau zawng hi sq km 10,491 a ni a, he mi huam chhungah hian mi 12,16,000 chuang an cheng a, state mipui hmun thuma ṭhena hmun khat a tling phak hial.

Hetih lai hian rorel lai Communist Party of India-Marxist, Congress, Bharatiya Janata Party (BJP) leh Indigenous Na­tionalist Party of Tripura-te chuan IPFT-te thil phut hi an thlawp loh thu an sawi a, state hran din chu an remti lo tih an sawi a ni.