Assam Raj Bhavan-ah Covid-19 kai 70 awm tawh

Assam khawpui, Guwahati-a Raj Bhavan-a thawk zinga mi 70 in hri an kai tih hmuh chhuah a ni tawh a, Raj Bhavan campus pum hi containment zone-ah puan a lo ni tawh bawk. 

July 1-a  personal security officer pahnihin hri an kai tih hriat a nih hnuah khan Governor Jagdish Mukhi, a nupui Prem Mukhi bakah Raj Bhavan-a thawktu leh security mi, mi 176 te chu test neih sak an ni a, an zinga 70 in hri hi an kai tih hriat a ni tawh. 

Kamrup Metropolitan District Deputy Commissioner Biswajit Pegu chuan Raj Bhavan campus pum leh a chhehvel chu containment zone-ah a puang tawh a ni. Gauhati Medical College Hospital (GMCH) Superin­tendent Dr Abhijeet Sharma pawhin Covid-19 a kai tih hriat a ni tawh a, damdawi-ina doctor leh nurse, contact a lo neihpui tawhte swab sample pawh endik mek a ni. 

Tinsukia Deputy Commi­ssioner Bhaskar Pegu pawh Covid-19 a kai avangin a in leh office chu containment zone-ah puan a ni tawh. Kar liam ta Inrinni-a DC Pegu nena programme pakhata an tel dun avangin Labour minister leh Tinsukia MLA Sanjay Kishan pawh a inkhung hrang nghal a, a test result a nghak mek. Tinsukia-a Joint Director of Health Altaf Ahmed pawhin hri hi a kai tih hriat a ni tawh bawk. Assam police zingah hri kai hi 869 hmun an ni tawh bawk a, an zinga 484 chu an dam tawh a, pakhatin a thihpui a ni. 

Assam-ah hian Pathianni khan hri kai hmuh chhuah thar mi 1,018 an awm leh a, an zinga 577 chu Guwahati khawpuia mi an ni. Hemi ni vek hian Covid-19 kai mi pali an thihbelh leh bawk a, hripui vanga thi hi mi 57 an awm tawh a ni. Health minister Himanta Biswa Sarma chuan an state-a hri kai hmuh chhuah tawh chu 23,999 an tling tawh tih sawiin, an zinga 15,203 chu enkawl dam an ni tawh tih a sawi. Pathianni khan hri kai dam tawh mi 858 chu enkawlna hmun aṭangin chhuah tir an ni. State recovery rate hi  68.72% a ni tih minister chuan a sawi bawk.