Tripura leh AP-ah hri kai hmuh tam ber ni thleng
Tripura leh Arunachal Pradesh-ah hri kai hmuh chhuah tam ber ni a thleng leh.
Pathianni khan Tripura-ah mi 223 in hri kai tih hriat thar a ni. Heng mite nena hri kai hmuh chhuah tawh hi mi 2,891 an tling tawh. Chief minister Biplab Kumar Deb chuan Pathianni khan sample 4,175 test a nih thu a sawi a, heng zingah hian positive 223 awmin an zinga 30 chu zin chhuahna nei lo, Covid-19 kai tawhte aṭanga an kai chhawng leh an nih thu a sawi bawk. Hri kai hmuh thar zingah mi 101 chu BSF mi leh sa an ni bawk.
Arunachal Pradesh-ah pawh Pathianni khan hri kai hmuh thar mi 90 awmin, ni khata hri kai hmuh chhuah tam ber ṭum a ni. Hri kai hmuh tawh hi mi 740 an ni tawh a, an zinga 282 chu enkawl dam ni tawhin, mi pathumin an thihpui tawh bawk.
AP-a hri kai hmuh chhuah thar zinga mi paruk chu taksa lama harsatna nei an ni. Hri kai hmuh tharte hi Covid Care Centre-ah dah luh nghal vek an ni tih state Surveillance Officer, Dr L Jampa chuan a sawi. Hun rei tak chhung chu Arunachal Pradesh hi Covid-19 kai awm lohna state a ni a, mahse state danga tangkhangte an haw khawm ṭan hnu, May 23 khan an state-a hri kai hmasa ber hmuh chhuah a ni.
Sikkim-ah hri kai thar mi 10 awm
Sikkim-ah pawh Pathianni khan hri kai hmuh chhuah belh mi 10 awmin, an state-a hri kai hmuh tawh hi mi 293 an awm tawh a ni. Hri kai hmuh thar zingah hian East Sikkim-a Singtam mi police pathum an tel. Hri kai hmuh tawh zingah 90 chu an dam tawh a, enkawlna hmun aṭangin chhuahtir an ni tawh.
Nagaland-ah hri kai 988 awm tawh
Nagaland-ah Covid-19 kai hmuh chhuah tawh chu mi 988 an tling tawh. Pathianni khan hri kai hmuh thar hi mi 10 awm lehin, an zinga paruk chu Kohima mi niin, Mokokchung mi pahnih bakah Longleng leh Dimapur mi pakhat ve ve an tel bawk. Hri kai zinga 405 chu enkawl dam an ni tawh a, enkawl mek hi mi 561 an la awm a ni.
Manipur-an zin chhuahna nei lo hri kai awm
Manipur-a hri kai hmuh chhuah thar zingah pawn lama zinchhuahna nei lo mi pahnih an awm tel a, hei vang hian khawtlanga hri a darh hlauhthawnna a lian hle tih official-ten an sawi. Pathianni khan hri kai hmuh thar mi 20 an awm a ni. Zin chhuahna nei lo hri kai hmuh chhuah pahnih zinga pakhat hi Imphal East district mi a ni a, pakhat dang hi Thoubal district mi a ni thung. Hri kai hmuh thar mi 20-te nen Manipur-a Covid-19 kai hmuh tawh zat hi 1,911 a tling tawh. An zinga 1,235 chu enkawl dam an ni tawh thung.