Governor chet dan hi dan kalh a ni : Liezietsu

Nagaland Chief Minister hlui Shurhozelie Liezietsu chuan, Governor P B Acharya-a'n a kaihhruai sorkar ṭhiata sorkar thar a din dan chu dan kalh niin a sawi.

Liezietsu hi Nilaini khan floor tset-ah a inlan loh avangin Governor chuan chief minister aṭanga paithlak a nih thu a sawi a, CM thar atan TR Zeliang chu lakluh zui a ni. P B Acharya chuan, "Liezietsu hi House-ah thlawptu a ngah tawk em tih fiah tura floor test buatsaihah a inlan loh avangin, ram danpui Article 164, Clause (I) tlawhchhanin a nihna aṭanga paithlak a ni ta a ni" a ti. Hetih lai hian Liezietsu-a thupuangtu Yitachu chuan, fiahna hmachhawn turin hun pek an nih loh thu a lo sawi tawh a, floor test neih tur pawh a hma zanin an hre chauh tih a sawi. Governor-in Nilaini-a special session a koh khan Liezietsu hi Kohima-ah a awm lo a, a tan inlan ngaihna a awm lo niin a sawi bawk.

Liezietsu hian Ningani khan thuthar thehdarhtute hmaah thu sawiin, a kaihhruai sorkar paihthlaa sorkar thar din a nih chhanah Governor chu a bultumtu ber a nih thu a sawi a, dan kalha cheah a puh bawk. Court chuan Governor hi inngaihtuah ṭha leh turin a hriattir a, heti chung hian Court thutlukna hi zah loin floor test hi a buatsaih nghal a ni, a ti. Governor chuan chawpchilh takin floor test buatsaih a nih thu a hrilh tih sawiin, ani pawhin amah leh amah thlawptute chu eng emaw harsatna avanga an inlan theih loh tur a hrilh ve nghal thu a sawi. Heti chung hian floor test hi kaltlangpui a ni ta tho a ni tiin, CM hlui Liezietsu chuan a lungawi loh thu a sawi.

Hetih lai hian Naga People’s Front (NPF) chief minister atana lakluh thar T.R. Zeliang chu kum ruk chhung atan an party aṭanga an hnawhchhuah thu an sawi. NPF working president Huskha Yepthomi chuan thu­chhuah siamin, CM Zeliang-a chu thuneihna duh avanga NPF kaihhruai Democratic Alliance of Nagaland (DAN) sorkar ṭhiat a, party president Liezietsu-a thuneihna chhuhpuia mawi lo taka a chet avangin party aṭanga hnawhchhuah a nih thu a sawi. NPF party thupuangtu Tokheho Yepthomi chuan, NPF MLA-te chu hruaitu pahnihte chetdanah hian an lawm lo hle niin a lo sawi tawh bawk a, an party kalphung kalha cheah a puh a ni.