Meghalaya sorkarin Railway project kaltlangpui remti

Meghalaya sorkar chuan an state-a railway project kalpui mek chu Khasi Students' Union (KSU)-te'n dodal mah se kaltlangpui a nih tur thu a sawi.

Chief Minister Mukul Sangma chuan hemi chung­changah hian media leh pawl hrang hrang aiawhte chu meeting neihpui an nih thu sawiin, railway project kaltlangpui tur hian state sorkar chuan thutlukna a siam ta tih a sawi. Project hi KSU-te'n dan loa state pawn mite luhna remchang a ni thei dawn tih sawiin, nasa takin an dodal a, project kalpui mek pawh tihtawp lailawk a ni. KSU president Lambokstarwell Marngar chuan he project hian Inner Line Permit (ILP) nei lo mi tam tak tan an state-a luhna kawng a hawnsak dawn tih sawiin, an thlawp lo tih a sawi.

Hetih lai hian Chief Minister Sangma chuan ILP chu state sorkar thuneihna a nih loh thu a sawi a, hemirual hian dan loa an state-a lut turte veng turin theihtawp a chhuah zel dawn tih a sawi. Hemi kawngah hian sorkar chuan zirlai pawl leh pawl hrang hrangte chu thawhpuiah a sawm tih a sawi bawk.