Assam-ah tuilian vanga thi 70 chuang tawh

Assam-a tuilian chuan ziaawm lam pan tawh mah se nunna chan erawh an la pun belh zel a, hriat theih chinah nunna chan hi mi 73 an awm tawh.

Assam State Disaster Management Authority (ASDMA) chuan tun hnaiah nunna chan mi pali an awm belh leh tih sawiin, thi zat hi mi 73 an tling tawh tih an sawi. Barpeta, Bongaigaon, Dhubri, Goalpara, Mori­gaon, Nagaon, Golaghat, Jorhat, Sivasagar, Karim­ganj leh Cachar district-te chuan tuilian hi an la tuar a, relief camp-ah mi eng emaw zat an la khawsa a ni. ASDMA chuan heng district-a khaw 583-te chu tuilian hian a la chim tih an sawi a, thlai chinna hmun ram hectare 27,000 vel zet a la chin tih an tarlang. Kaziranga National Park pawh tuilin a ram zau zawk a chim tawh a, ramsa te himna turin anti-poaching camp 18 din a ni tawh bawk. State sorkar chuan harsatna tawkte chhawmdawl hna a thawk reng a, buhfai leh eitu dang ṭhahnem tak semchhuah a ni tawh a, sem mek zel a ni bawk.

Kumin bikah Assam-a tuilian hian district 33 zinga 29 a nghawng buai a, mi nuai 18 vel zetin harsatna an tawk. ASDMA-in an tarlan danin thlai chinna hmun hectare 1,86,998.68 zet chu tuilian hian a chimpil a, ramsa pawh 100 chuang an thi tawh a ni. Kaziranga National Park huam chhung 80% vel zet tuilian hian a chim a, Bokakhat, Agaratoli, Kohora, Bagori, Burapahar leh Biswanathghat-ahte anti-poaching camp 100 chuang siam a ni. Tuilian hian National Highway 37-a lirthei chevel pawh a nghawng buai hle niin a tarlang bawk.