Assam-Arunachal border panel-ten ramri an tlawh

Assam leh Arunachal Pradesh sorkarin ramri buaina an neihna hmuna inremna siam tura Namsai Declaration an lo ziah tawh bawhzuiin, state pahniha regional committee-te chuan Thawhṭanni khan ramri buaina an neihna hmunte an tlawh.

Assam regional committee hotu, state cabinet minister Atul Bora chuan Arunachal Pradesh regional committee nen border area hi tlawhin, heng hmuna chengte chu an kawm nghal tih a sawi. Arunachal Pradesh team hi deputy chief minister Chowna Mein-a'n a ho a ni.

Team pahnihte hian Assam-a Tinsukia leh Arunachal Pradesh-a Namsai district inrina, Mengkengmiri Simanta leh Tengapani area-te an tlawh a, an buaina chu chinfel thuai a nih tur thu an sawi.

Hetih lai hian Assam minister Pijush Hazarika kaihhruai leh Arunachal Pradesh minister Mama Natung kaihhruai regional committee dang chuan Pakke Kesang district, Arunachal Pradesh leh Biswanath leh Sonitpur district, Assam-a ramri buaina an neihdante an lo sawiho ve bawk a ni. Team pahnihte hain September 2 leh 3-ah an buaina hmunte hi an tlawh dawn a, thil awmdante ngun taka an zirchian hnuah committee-te hian September 15-ah state pahnih chief minister-te hnenah report an thehlut ang.

Arunachal Pradesh minister Natung chuan state pahnih chief minister-ten boruak ṭha tak hnuaia ramri buaina chinfel dan ngaihtuaha hma an la chu lawmawm a tih thu a sawi a, Assam chu û zawk a nih anga mawhphurhna la a, ramri bialte tihhmasawnna tura chak zawka hma la turin a ngen bawk. Buaina chinfel a nih phawt loh chuan border area-a chengte tan hmasawnna tluantling a thleng thei tak tak lo nia sawiin, Assam minister Hazarika chuan prime minister Narendra Modi leh union home minister Amit Shah-te enpuina hnuaiah inremna an siam ngei a beisei thu a sawi.