Ramri-a inremna siam dan duh loin Pawl hrang hrangin Shillong-ah lungawi lohna lantir

Assam leh Meghalaya chief minister-ten ramri buaina an la neihna hmuna inremna siam dan ngaihtuaha inbiakna an chhunzawm leh hnuah, Thawhṭanni khan pawl hrang hrang leh border area-a chengte chuan Shillong-ah lungawi lohna an lantir.

Shillong-a nawrh huaihawtte hian state pahnihten kumin March 29-a ramri hmun paruka inremna an siam, Memorandum of Understanding (MoU) chu ṭhiat emaw, ennawn emaw turin an phut. An remtihna tel loin an ram chu mi dang kuta pek an remtih loh thu an sawi.

Inrem thawh khatna an siama Assam lama bet tura tih, Malangkona-a cheng tam zawk chu Garo an ni a, Assam-ah awm an duh lo tih an sawi. Sorkar pahnihin inremna an ziah dawn hian ramri hrula chengte duhdan an ngaih pawimawh sak lo tih an sawi bawk.

Federation of Khasi Jaintia and Garo People (FKJGP) president Pritam Arengh chuan mipuite chunga dik lo taka ro rel an nih avangin dan angin hma an la zui dawn tih a sawi.

Association for Demo­cracy and Empowerment (ADE) president Dalseng Momin pawhin state pahnihte MoU lo ziah tawh chu an pawm lo a, an dodal zel dawn tih a sawi bawk.