Nagaland : FM-in bankers' conclave a hmanpui

Union finance minister Nirmala Sitharaman-i chuan nimin khan Kohima, Nagaland-ah bankers' conclave a hmanpui.

Finance Minister hi ni thum cham turin Thawhṭanni khan Nagaland a thleng a, Corporate Social Responsibility (CSR) hnuaia private company hrang hrangte project siam 52 a hawng nghal. Heng project zinga a tam zawk hi health, education and skill leh entrepreneuship development sector kaihhnawih an ni.

Thawhṭanni khan ni thum awh tur CRS and Investment Conclave chu Sitharaman hian a hawng a, he hunah hian corporate leh investor 100 chuang an tel.

Nagaland-in CSR investmen an hmu ṭha lo chu pawi a tih thu Finance Minister chuan a sawi a, company leh industry hrang hrangte tan investment tihna hmun ṭha tak tur a ni, a ti. State sorkar chu NITI Aayog hnuaia Atal Innovation Mission Project hmang ṭangkai a, zirlaite tana science lab leh innovation hub siam turin thurawn a pe zui bawk.

Union Minister hian nimin zing khan Mon district-ah Axis Bank branch thar a hawng a, vawiin hian Chumoudedima district-ah Nagaland-a sumdawngte nen hun an hmang leh ang. Sovima khuaa puantahna hmunpui, Heirloom Naga a tlawh dawn bawk a, hemi hnu hian Delhi lamah a kir tawh dawn a ni.