Nagaland CM Zeliang-a'n fiahna paltlang ; Cabinet minister tur ruat nghal

24th July, 2017

Nagaland chief minister T R Zeliang chuan kar kalta Zirtawpni khan Assembly House-ah floor test a hmachhawn a, sorkar thar din turin thlawptu a ngah tawk em tih fiahna chu a paltlang. Zeliang hian fiahna a paltlang hnuah a cabinet minister tur a ruat nghal bawk.

Floor test-ah hian MLA 59 zinga 47 chuan chief minister hi an thlawp a, Zelianga thlawptute hi Naga People’s Front (NPF) MLA 36, Bharatiya Janata Party (BJP) MLA 4 leh Independent MLA pasarih an ni. Hetih lai hian chief minister aṭanga paihthlak Shurhozelie Liezietsu chuan lamṭang mi 11 chauh a nei a, NPF MLA 10 leh Independent MLA pakhat chauhin an vote a ni. Assembly speaker Imtiwapang chuan chief minister T.R Zeliang chuan thlawptu a ngah tawk tih sawiin, hneh takin fiahna a paltlang a ni, a ti.

T.R. Zeliang hi kar kalta Ningani khan Nagaland chief minister 19-na atan lakluh a ni a, hetih rual hian Governor P.B. Acharya chuan Shurhozelie Liezietsu-a kaihhruai sorkar chu ṭhiah a nih thu a puang. Zeliang hi tribal-te chuan Urban Local Body (ULB) election-a hmeichhe tana seat 33% hauhsak a nih chungchangah mawhphurtu berah an puh a, kumin February thla khan chief minister a nihna aṭangin a bang a ni. A ban hnu hian NPF party president Shurhozelie Liezietsu chu chief minister atan lakluh zui a ni a, mahse thla rei lote hnuah paihthlak a ni zui ve leh ta a ni.

Chief Minister thar T.R.Zeliang hian Inrinni khan a cabinet minister tur te a ruat nghal a, NPF MLA pariat leh BJP MLA pahnih te chu minister atan hian a ruat a ni. Governor P.B. Acharya chuan cabinet minister tharte hi rinawmna thu tiam tirin a la lut a ni. Lawmluhna inkhawm hi Raj Bhavan-ah buatsaih a ni a, he hunah hian CM Zeliang, Lok Sabha MP Neiphiu Rio, assembly speaker Imtiwapang Aier, NPF leh BJP hruaitu eng emaw zat an tel .

Minister atana lakluh - Yanthungo Patton, Kipili Sangtam, G. Kaito Aye, Imkong L. Imchen leh Tokheho Yepthomi-te hi Liezietsu-a kaihhruai sorkar-ah khan minister an ni a, mahse CM laka an hel avangin Liezietsu hian an nihna a hlihsak a ni. Hetih lai hian Neiba Kronu leh Neikiesalie Nicky Kire-te pawh Liezietsu-a'n a lo suspend tawh te tho kha an ni a, an vai hian NPF party mi leh sa an ni. Minister ni sa bakah hian Kejong Chang chu minister atan ruat belh a ni a, ani pawh hi NPF party tho a ni. Anni rual hian BJP aṭangin Imtilemba Sangtam leh Mhonlumo Kikon-te chu cabinet minister atan hian lakluh an ni ve bawk.

NPF-in MLA 10 suspend

Naga People’s Front (NPF) chuan kar kalta Zirtawpni khan an party MLA 10-te chu suspend an nih thu an puang a, an rual hian an party mi leh sa mi 19-te pawh party thila inrawlh lo turin an hrem bawk. Thutlukna hi Disciplinary Action Committee (DAC)-in a siam a nih thu an puang a, heng mite hi party kalphung pela che te an nih thu an sawi. DAC chuan an party mi leh sa suspend-te chu chhan leh vang awm loa party president Liezietsu-a bang tura nawrtute an nih thu an sawi. Heng mite hian NPF constitution an bawhchhia a, ngun taka ngaihtuah a nih hnuah an chungah hremna lek a nih tak thu an tarlang bawk.

NPF hian an MLA eng emaw zat chu party president Liezietsu-a chief minister a nihna aṭanga paihthlak a nih theih nana hma laah puhin an lo suspend tawh a ni. Tunah MLA 10 an suspend leh tak avangin NPF MLA suspend zat chu mi 20 an ni tawh. NPF MLA suspend te chu - MLA suspend te chu - Noke Wangnao, Y. Patton, C. Kipili Sangtam, G. Kaito Aye, Imkong L. Imchen, Deo Nukhu, Dr. Benjongliba Aier, Shetoyi, Khekaho Assumi, Naiba Konyak, Nuklutoshi, Dr. Longriniken, Phowang, Er. Kropol, C.M. Chang, S. Pangnyu Phom, Tokheho Yepthomi, Merentoshi Jamir, Imtikumzuk leh TR Zeliang-te an ni. NPF party thuneitu sang Disciplinary Action Committee (DAC) chuan T.R Zeliang-a chu Liezietsu-a chief minister aṭanga paihthla tura hma a lak avang leh, party duh dan pela a chet avangin suspend a nih thu an lo puang tawh a, a rual hian party mi leh sa eng emaw zat suspend an ni bawk.