Assam-a tuilianin ziaawm lam a pan

Assam-a tuilian chuan ziaawm lam a pan chho mek zel a, tuilian tuar hi mi 90,000 vel chauh an awm tawh tih tarlan a ni.

District 11-te chuan tuilian hi an la tuar a, mahse harsatna tawk zat chu an tlahniam tawh a ni. Tuilian tuar hi mi nuai khat pawh an tling tawlo a, a nasat ber lai khan mi nuai 20 an chuang a ni. Hetih lai hian Assam State Disaster Management Authority (ASDMA) chuan tunhnai khan Morigaon district-ah mi pakhat a thi leh tih an sawi a, tuilian vanga nunna chan hi mi 76 an tling tawh tih an sawi. ASDMA chuan tuilian tuar hi mi 90,000 vel chauh an ni tawh tih an sawi a, Lakhimpur, Biswanath, Barpeta, Morigaon, Nagaon, Karbi Anglong, Golaghat, Jorhat, Sivasagar, Karimganj leh Cachar district-te chuan harsatna hi an la tawk tih an sawi.

Hetih lai hian Assam Lok Sabha MP RP Sharma chuan tuilian tuarte chhawmdawlna tur hian sorkar laipui chuan cheng vaibelchhe 12,000 a pechhuak thuai tur a ni, a ti. Lok Sabha MP chuan tuilian avang hian mi 70 chuang an thi tawh tih sawiin, chenna tur nei lo mi tam tak an awm bawk a, heng mite ṭanpuina tur hian sorkar laipui chu a che chhuak thuai tur a ni, a ti. MP Ram Kumar Sharma chuan hemi chungchang bawhzui tur hian high-level team tirh a phut thu a sawi bawk.

Assam Chief Minister Sarbananda Sonowal chuan tuilian avanga lonei­tu harsatna tawkte chu chhawmdawlna pek an nih tur thu a sawi. Assam CM chuan, sorkar laipui leh state sorkar chuan tuilian nasa tak avanga harsatna nasa tawk loneitute chhawmdawlna tur hian ṭanpuina a pe dawn a ni, a ti. Loneitute chuan an buh leh bal tam tak an chan a, an intunnun lehna turin sorkar chuan kawng hrang hrangin a ṭanpui dawn a ni. Hemi atan hian Kisan Credit Card, Pradhan Mantri Fasal Bima Yojana, Pradhan Mantri Krishi Sinchai Yojana leh scheme dang eng emaw zat duan a nih tur thu a sawi bawk.

Assam CM Sonowal chuan loneituten an thar chhuah ṭhin let an thar chhuah theih nan Chief Minis­ter’s Samagra Gramya Unnayan Yojana scheme duan a nih tur thu a sawi bawk. Hemi atan hian cheng vaibelchhe 30,000 rua­hman a nih thu a sawi.