Sorkar laipuiin Assam hnenah central fund 60% la pe lo : CAG
Comptroller and Auditor General (CAG) report aṭanga a lan danin, Assam sorkarin flood management programme kalpuina atana central fund aṭanga sum a hmuh tur 60% zet chu sorkar laipuiin a la pe chhuak lo.
CAG report hi Parliament-ah pharh a ni a, sorkar laipui chuan Assam-a flood management programme atan hian cheng vaibelchhe 2043.19 a ruahman tih tarlan a ni. Flood management programme hnuaiah hian project 141 kalpui tura ruahman a ni. Hetih lai hian sorkar laipuiin central fund aṭanga pawisa a pek tur zinga 60% zet chu tun thlengin Assam sorkar hnenah pek chhuah a la ni lo. Sorkar kum 2007 - 08 aṭanga 2015 - 16 chhungin flood management programme atan hian cheng vaibelchhe 2043.19 ruahman a ni a, central fund aṭangin sorkar laipui chuan cheng vaibelchhe 812.22 pe chhuakin, pek chhuah loh vaibelchhe 1230.97 a awm a ni. Hei hi flood management programme atan sum ruahmana aṭanga chhutin 60% a tling tih CAG report chuan a tarlang.
Hetih lai hian Assam sorkar pawhin flood management programme hnuaia project kalpuina tura sum a thawh ve tur aṭanga, 82% zet chu a la pe chhuak lo tih tarlan a ni bawk. Project atan sum ruahman te pek chhuah mumal a nih loh avangin project hi duh anga chaka kalpui theih a ni lo. CAG chuan Union Water Resources Ministry chu project atan sum ruahman pek chhuah kawnga chak zawka hma la turin a hriattir a, Flood Management Programme (FMP) guideline-te chu zawm turin a ti. Hei bakah hian hna thawh chhun zawm a nih theih nana reimbursement pe chhuak tur leh sum pek chhuah ang te a hmanna turah hman a ni em tih vil turin ministry chu a hriattir bawk.
FMP guideline-ah hian hmarchhak state-te chu special category pek an ni a, hmarchhak bakah hian Himachal Pradesh leh Jammu and Kashmir-te chu an tel bawk. Special category state-ahte hian project senso 90% chu sorkar laipuiin a tum a, state sorkar ten 1% chauh an tum thung a ni. Mahse hei hi July 2013 khan siam ṭhat a ni a, heng state-ahte hian sorkar laipui chuan 70% a tum tawh dawn a, special category state-te chuan 30% an tum tawh thung a ni.